شارەزایەکی کەشناسی: پلەکانی گەرما زیاتر نزم دەبنەوە

ئاڤا نیوز

شارەزایەکی کەشناسی عێراق دەڵێت، هەرچەندە لە سەرەتای مانگی داهاتووەوە پلەکانی گەرما قۆناغ بە قۆناغ زیاتر نزم دەبنەوە، بەڵام پێشبینی هیچ بارستە هەوایەکی سارد ناکرێت کە ببێتە هۆی گۆڕانکاریی خێرا لە پلەکانی گەرمادا.

وێنە گەورەکە: ماوەی چەند ڕۆژێکە پلەکانی گەرما لە عێراق و کوردستان نزمبوونەوەی بەخۆیەوە بینییووە، کەشناسی عێراقیش دەڵێت، سبەی دووشەممە بەرزترین پلەکانی گەرما لە شارەکانی کوردستان لەنێوان 27 بۆ 30 پلەی سیلیزی دەبێت.

لێدوانی فەرمی: سادق عەتییە، شارەزای کەشناسی عێراق ڕایگەیاند، لە مانگی داهاتووەوە پلەکانی گەرما قۆناغ بە قۆناغ نزم دەبنەوە بەڵام هیچ گۆڕانکارییەکی خێرا وەک بارستە هەوایەکی سارد ڕوونادات، بەڵکو لەگەڵ نزیکبوونەوەی وەرزی زستان پلە گەرما وردە رودە نزم دەبنەوە.

ئاماژەی بەوەشکرد، مانگی داهاتوو لە شارەکانی عێراق پلەکانی گەرم مام ناوەند دەبن و شەوانیش سارد دەبێت، بەتایبەتیش لەدوای ناوەڕاستی مانگی داهاتوو، بەجۆرێک لە ناوچە شاخاوییەکان و هەندێک ناوچەی هەرێمی کوردستان بەڕوونی هەستی پێدەکرێت، ئەوەش لە نێوان وەرزی پایز و زستان دۆخێکی کەشوهەوای سروشتیی و ئاساییە.