زیاتر  لە نیو ملیۆن مووچەخۆر لەڕێگەی هەژماری من مووچەی مانگی هەشت وەردەگرن

ئاڤا نیوز

سبەی مووچەی مانگی هەشتی مووچەخۆرانی هەرێمی کوردستان دابەش دەکرێت و زیاتر لە نیو ملیۆن فەرمانبەری مەدەنی و خانەنشین بەشێوەی دیجیتاڵی و لەڕێگەی "هەژماری من"ـەوە مووچەکانیان وەردەگرن.

چیرۆکی سەرەکی: دوای خەرجکردنی مووچەی مانگی هەشتی مووچەخۆرانی هەرێمی کوردستان لەلایەن بەغدا، وەزارەتی دارایی کوردستان لیستی مووچەی بڵاوکردەوە و لەماوەی سێ ڕۆژدا سەرجەم مووچەخۆران مووچەکانیان وەردەگرن.

لێدوانی فەرمی: تیمی هەژماری من بە ئاڤایان گوت، تاوەکو ئێستا 950 هەزار مووچەخۆر تۆمارکراون، کارتی بانک بە 610 هەزار مووچەخۆر دراوەتەوە، ئەم مانگە 550 هەزار مووچەخۆر لەڕێگەی هەژماری من مووچە بە دیجیتاڵی وەردەگرن، لە سەرتاسەری هەرێمی کوردستانیش 580 ئامێری ڕاکێشانی پارە دانراون.

ئەو مووچەخۆرانەی ئەم مانگە بە هەژماری من مووچە وەردەگرن، 288 هەزاریان مووچەخۆری مەدەنین، 195 هەزاریان پێشمەرگە و کارمەندی ئاسایشن، 63 هەزاریان خانەنشینن.

ژمارەکان وا دەڵێن: خشتەی دابەشکردنی مووچە بەشێوەی دیجیتاڵی بەپێی پارێزگاکانی هەرێمی کوردستان بەم شێوەیەیە:

٠ پارێزگای هەولێر: 287 هەزار و 195 مووچەخۆر.

٠ پارێزگای سلێمانی: 106 هەزار و 450 مووچەخۆر.

٠ پارێزگای دهۆک: 153 هەزار و 120 مووچەخۆر.

٠ کۆی گشتی دەکاتە 546 هەزار و 765 مووچەخۆر.