پێش هەڵبژاردن لیستی مووچە ڕەوانەی بەغدا دەکرێت

ئاڤا نیوز

وەزارەتی دارایی و ئابووری هەرێمی کوردستان بە چڕی کار لەسەر ئامادەکردنی لیستی مووچەی مانگی 10 دەکات، ئەم مانگە لیستی مووچەی خانەنشینانیش لە ڕێگەی سیستمی پەیڕۆڵەوە دەبێت، ئەگەر ئەم هەفتەیە تەواوبێت ڕەوانەی بەغدا دەکرێت.

وێنە گەورەکە: ماوەی 10 ڕۆژ سیستمی پەیڕۆڵ کارا کراوەتەوە، بەشێکی زۆری یەکە ژمێریارییەکان کارەکانیان تەواوکردووە و لیستەکەیان ناردووەتەوە وەزارەتی دارایی.

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "لیستی مووچەی مانگی 10 لە قۆناغی کۆتاییدایە و چەند وردەکارییەکی کەمی ماوە، ئەگەر ئەم هەفتەیە تەواوبێت لەڕێگەی تیمێک ڕەوانەی بەغدا دەکرێت."

لەلایەکی دیکەوە: یادگار جەبار، بەڕێوەبەری بایۆمەتری سلێمانی بە ئاڤای ڕاگەیاند، "لیستی مووچە تەواوبووە، ڕەوانەی وەزارەتی دارایی هەرێمی کوردستان کراوە و لە بەشی ژمێریارییە."