خانمانی عێراق پلەی سێیەمی وڵاتانی عەرەبی دەگرن لە جگەرەکێشاندا

ئاڤا نیوز

بەپێی ڕاپۆرتێکی نێودەوڵەتی، بۆ ساڵی 2025، عێراق لە ڕووی ڕێژەی جگەرەکێشانی ژنانەوە، لە پلەی سێیەمی وڵاتانی عەرەبیدایە، ئەمەش لەکاتێکدایە کە عێراق بە گشتیی لە ڕێژەی جگەرەکێشاندا لە پلەی هەشتەمی وڵاتانی عەرەبیدایە. 

وێنە گەورەکە: پێگەی وۆرلد پۆپوڵەیشن ڕیڤیو، بە پشتبەستن بەداتای  164 وڵاتی جیهانی ڕاپۆرتێکی سەبارەت بە ڕێژەی جگەرەکێشان لە نێوان هەردوو ڕەگەزدا بۆ ساڵی  2025 بڵاوکردووەتەوە، بەپێی ڕاپۆرتەکە ئەردن لە پێشەوەی وڵاتانی عەرەبییە لە ڕێژەی جگەرەکێشاندا و لە پلەی یازدەهەمی جیهانیدا دێت، دوای ئەویش لوبنان لە پلەی دووەمی وڵاتانی عەرەبی دێت، پاشان میسر، جەزائیر، یەمەن، کوێت و تونس و عێراقیش لە پلەی هەشتەمدا دێت.

ژماره‌كان واده‌ڵین: ڕاپۆرتەکە ئاماژەی بە ڕێژەیەکی بەرزی جگەرەکێشان لەنێو خانمانی عێراقدا کردووە کە گەیشتووەتە 14%، بەمەش عێراق لە پلەی سێیەمی وڵاتانی عەرەبیدا  لە دوای لوبنان 25% و ئەردن 14% دێت. لە کاتێکدا ئەم ڕێژەیە لە میسر تەنها 03% بووە کە نزمترین ڕێژەیە لە وڵاتانی عەرەبیدا.

لەلایەکی دیکەوە: سەبارەت بە ڕێژەی جگەرەکێشانی پیاوان، ئەردن لە پێشەوەی وڵاتانی عەرەبی بووە بە ڕێژەی 58.4%، دوای ئەو میسر بەڕێژەی51.1% و لوبنان 43.3%، عێراقیش بە ڕێژەی 36.9% لە پلەی حەوتەمی عەرەبیدا بووە.