لە بەغدا ئەندامێکی داعش دەستگیر کرا؛ "دەستی هەبووە لە کوشتنی 19 ئەندامی هێزە ئەمنییەکان"

ئاڤا نیوز

دەزگای ئاسایشی نیشتمانیی عێراق ڕایگەیاند، لە بەغدا ئەندامێکی داعشیان دەستگیرکردووە کە لە ساڵی 2014ەوە بەشداریی لە دەیان هێرشی ڕێکخراوەکە بۆسەر هێزە ئەمنییەکانی عێراقدا کردووە و بەهۆیانەوە 19 ئەندامی هێزە ئەمنییەکان کوژراون.

 

وێنە گەورەکە: لە عێراق ناوەناوە شانە نوستووەکانی داعش دەستگیردەکرێن و دەکرێنە ئامانج، بەشێکیان دوای نەمانی ڕێکخراوەکە ناسنامەی خۆیان دەشارنەوە و لە شار و شارۆچکەکاندا بە نهێنی ژیان دەکەن، بۆیەش هێزە ئەمنییەکان لەگەڵ دەستکەوتنی زانیاریی لەبارەیانەوە دەستگیریان دەکەن.

 

ڕاگەیێنراوی فەرمی: دەزگای ئاسایشی نیشتمانیی عێراق ئەمڕۆ سێشەممە لە ڕاگەیێنراوێکدا ئاماژەی بەوەشكردووە، ئەو کەسەی دەستگیرکراوە ناوی ئەبو محەممەدە و لە ساڵی 2014ەوە پەیوەندی بە داعشەوە کردووە، لەو ماوەیەدا لە چەندین هێرشدا بەشداربووە کە بوونەتەهۆی کوژرانی 19 ئەندامی سوپا و هێزەکانی حەشدی شەعبی.

 

ئەوەشی خستووەتەڕوو، ئەو ئەندامەی داعش لە ناوچەی زوبع-فەلوجە بەرپرسی کاروباری لۆجستی و کارگێڕی ڕێکخراوەکە بووە، دواتر بۆ سووریا هەڵاتووە و بەم دواییانەش بە نهێنی بۆ بەغدا گەڕاوەتەوە، بەڵام دوای چاودێریکردنی، لە ئۆپەراسیۆنێکدا دەستگیر کراوەو ڕادەستی دادگا کراوە.