دانیشتووانی فاو لە بەسرە بەهۆی نەبوونی خزمەتگوزاری خۆپیشاندانیان ئەنجام دا

ئاڤا نیوز

 

دەیان دانیشتووی قەزای فاو لە بەسرە کە بە ئاو و نەوت دەوڵەمەندە بەهۆی نەبوونی خزمەتگوزاری و بێکارییەوە خۆپیشاندانیان ئەنجام دا، بەگوتەی خۆیان قەزاکەیان لەسەر نەخشەی خزمەتگوزاری و گەشەپێدان "فەرامۆشکراوە".

 

چی ڕوویدا: ڕۆژی سێشەممە 28ی تشرینی یەکەم 2025، خۆپیشاندانە کە بەڕێوەچوو، بەهۆی قەیرانە قووڵەکانی خزمەتگوزاری و نەبوونی هەلی کار لەم شارە دەوڵەمەندە بە نەوت و ئاوە. خۆپیشاندەران داوایان کرد پارێزگاری بەسرە پێداچوونەوە بە دۆخی فاو بکات و پشتگیری لە پڕۆژەکانی ژێرخان و دامەزراندنی خەڵکی ناوچەکە لە فەرمانگە حکومییەکان و کۆمپانیا نەوتییەکان بکات.

 

لێدوانی فەرمی: هەیسەم سەجاد، نوێنەری خۆپیشاندەران، بە ئاڤا میدیای ڕایگەیاند: "هاتنەدەرەوەی خەڵک بۆ سەر شەقام بەهۆی کەڵەکەبوونی فەرامۆشکردنەوە بوو، داوا دەکەین پارێزگار بەپەلە سەردانی فاو بکات و گوێ لە ناڵەی هاووڵاتیان بگرێت، چونکە قەزاکە پاشەکشەیەکی مەترسیدار لە خزمەتگوزارییە سەرەکییەکاندا دەژی."

 

لەهەمان کاتدا: سەجاد ئاماژەی بەوەدا، سەرەڕای گرنگیی دەریایی و ستراتیژیی فاو وەک تاکە دەروازەی دەریایی عێراق، بەڵام دانیشتووانەکەی لە دابینکردنی هەلی کار و خزمەتگوزارییە سەرەتاییەکان بێبەشن.

 

پەیامی فەرمی: لە بەرامبەردا، ئەسعەد عیدانی، پارێزگار بەسرە لە پەیامێکی دەنگیدا جەختی لەوە کردەوە، بەپێی ئەو ڕێککەوتنانەی لە نێوان حکومەتی خۆجێی و کۆمپانیاکانی جێبەجێکاردا ئەنجامدراون، لە هەلی دامەزراندن ئەولەویەت دەدرێت بە دانیشتوانی قەزاکە و گوتیشی: "حکومەتی خۆجێی ڕێگە نادات خەڵکی شاری فاو لەو پڕۆژانەی لەسەر زەویەکانیان جێبەجێ دەکرێن دوور بخرێنەوە"، ئاماژەی بەوەشکرد "قۆناغی داهاتوو شایەتحاڵی چاودێریی وردی میکانیزمەکانی دامەزراندن و گرێبەستکردن لەگەڵ کۆمپانیاکان دەبێت بۆ دڵنیابوون لە دابینکردنی هەلی کارێکی دادپەروەرانە".