عێراق بڕیاری زیادکردنی ڕسومات لەسەر گیراوەیەکی دەرمانی هاوردەکراو دەدات

ئاڤا نیوز

ئەنجوومەنی وەزیرانی عێراق بە بڕیارێکی نوێ ڕسوماتی گومرگی 50% دەخاتە سەر هاوردەکردنی گیراوە دەرمانییەکانی (سۆدیۆم کلۆراید) بۆ ماوەی چوار ساڵ، بە ئامانجی پاراستن و گەشەپێدانی بەرهەمی ناوخۆیی و ڕێکخستنی بازاڕ.

 

چیرۆکی سەرەکی: سێشەممە 2025-10-28، ئەنجوومەنی وەزیرانی عێراق بە سەرۆکایەتی محەممەد شیاع سوودانی، سەرۆکوەزیرانی عێراق کۆبووەوە، لە کۆبوونەوەکە چەندین بڕیار دران.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیران، ئەنجوومەنی وەزیران بڕیاری دا ڕسوماتی گومرگیی زیادە بە ڕێژەی (50%) لەسەر بەهای یەکەی پێوانەی بەرهەمی (گیراوە دەرمانییەکانی سۆدیۆم کلۆراید 100 ملم و 500 ملم) کە لە هەموو وڵاتان و سەرچاوەکانەوە هاوردەی عێراق دەکرێن، بۆ ماوەی 4 ساڵ و بەبێ کەم کردنەوە بسەپێنێت.

 

ئەوەی ئێستا ڕوودەدات: ئەم بڕیارە بە ئامانجی پاراستنی بەرهەمی ناوخۆیی و پشتگیریکردنی پیشەسازیی دەرمانسازیی عێراقی دێت، هاوکاتیش مەبەست لێی ڕێکخستنەوە و چاودێرکردنی بازاڕی ناوخۆییە لە ماوەی جێبەجێکردنی ئەم ڕسوماتە گومرگییە زیادانەدا.