دادگای فیدڕاڵی سکاڵای کاندیدەکان ڕەتدەکاتەوە

ئاڤا نیوز

 

دادگای فیدڕاڵی بەهۆکاری نەبوونی تایبەتمەندییەوە، داواکاری چەندین کاندیدی بۆ هەڵوەشاندنەوەی بڕیاری دوورخستنەوەیان لە کێبرکێی هەڵبژاردنی پەرلەمانی عێراق ڕەتکردووەتەوە، ئەوەش بە شێوازێکی تازەی کارکردنی پێکهاتەی نوێی دادگاکە لەبارەی هەڵبژاردنەوە دادەنرێت.

 

وێنە گەورەکە: ئەنجوومەنی کۆمیسیاران لە کۆمیسیۆنی هەڵبژاردنەکانی عێراق بڕیاریداوە تا دوای هەڵبژاردن و دەرچوونی کاندیدەکانیش بۆ پەرلەمان، ئەگەر ڕاپۆرتی لایەنە پەیوەندیدارەکانی لەبارەی کاندیدەکانەوە بەدەستبگات، دەتوانێت کاندیدەکان لە کێبرکێی هەڵبژاردن و گەیشتن بە پەرلەمان دووربخاتەوە، تائێستاش سەدان کاندیدی بەهۆی نەبوونی مەرجەکانی شیاویەتییەوە لە کێبرکێی هەڵبژاردن دوورخراونەتەوە.

 

ڕاگەیێنراوی فەرمی: دادگای فیدڕاڵی لە کۆبوونەوەی ڕۆژی سێشەممەیدا سکاڵایەکی خلود حوسێن عەلی، کاندیدی ژمارە 21ـی لیستی قادیموون لە پارێزگای بابلی ڕەتکردەوە کە داوای کردبوو بڕیاری دوورخستنەوەی لە کێبرکێی هەڵبژاردن بە نادەستووری لە قەڵەم بدرێت، دادگاکە دەڵێت، ئەم بابەتە لە تایبەتمەندیی دادگای فیدڕاڵی نییە.

 

ئەو مانایەی دەیگەیێنێت: هەر کاندیدێک ئەگەر بڕیاری دوورخستنەوەی بدرێت، دەتوانێت لە دەستەی دادوەریی هەڵبژاردنەکانی عێراق سکاڵا تۆمار بکات، بڕیاری دەستەکەش بۆ کۆمیسیۆن و کاندیدەکەش پابەندکار دەبێت.