سوودانی: بایکۆتی دەنگدان دەرگا بۆ گەڕانەوەی "گەندەڵکار و شکستخواردووەکان" دەکاتەوە

ئاڤا نیوز

 

سەرۆکی هاوپەیمانیی ئاوەدانکردنەوە و گەشەپێدان دەڵێت، نایانەوێت حکومەتی داهاتووی عێراق حکومەتی قەیران و کاردانەوە بێت بەڵکو دەیانەوێت درێژە بە کاروانی ئاوەدانی بدات، هۆشدارییش لەبارەی بایکۆت دەدات و بە کردنەوەی دەرگا "بەڕووی گەڕانەوەی گەندەڵکار و شکستخواردووەکان" ناوی دەبات.

 

وێنە گەورەکە: محەممەد شیاع سوودانی، سەرۆکوەزیرانی عێراق بۆ ئەم هەڵبژاردنە لیستی تایبەت بە خۆی هەیە و ناوی ناوە "هاوپەیمانیی ئاوەدانکردنەوە و گەشەپێدان"، ئەم لیستە لەگەڵ لایەنە شیعەکان بەگشتی و بەتایبەت هاوپەیمانیی دەوڵەتی یاسا کە نووری مالیکی سەرۆکوەزیرانی پێشووتری عێراق سەرۆکایەتی دەکات، لە کێبەرکێی توونددایە، چاوەڕێش دەکرێت یەکێک لەم دوو لایەنە زۆرترین کورسی لەسەر ئاستی پێکهاتەی شیعە بەدەستبهێنێت.

 

لێدوانی فەرمی: محەممەد شیاع سوودانی، سەرۆکی هاوپەیمانیی ئاوەدانکردنەوە و گەشەپێدان، شەوی ڕابردوو لە بەغدا قسەی بۆ بەشێک لە لایەنگرانی کرد و ئاماژەی بەوەشکرد، حکومەتەکەی چەندین دەستکەوتی لە چەندین بواردا بەدەستهێناوە و بۆ درێژەدانیش بە دەستکەوتەکان پشتیان بە هۆشیاری دەنگدەران و بەشدارییان لە هەڵبژاردن بەستووە، چونکە پێیان وایە هیچ پاساوێک بۆ بایکۆت نییە و دەنگنەدان "دەرگا بۆ گەڕانەوەی گەندەڵکار و شکستخواردووان دەکاتەوە، بەوەش پڕۆژەی ئاوەدانی و گەشەپێدان دەوەستێت."

 

وتیشی، ئەم هەڵبژاردنە داهاتووی سیاسیی عێراق نەخشەڕێژ دەکات، بۆیە پێویستە سیاسەتێک دابنرێت کە بەرژەوەندیی عێراقییەکان بخاتەپێش هەموو بەرژەوەندییەکانی دیکە، نەک سیاسەتی دروستکردنی قەیران و کاردانەوە پەیڕەو بکات و عێراق لە کێشەی ناوخۆیی و دەرەکی تێوەبگلێنێت.