عێراق پڕۆژەی نۆژەنکردنەوە و بەڕێوەبردنی فڕۆکەخانەی بەغدا دەداتە کۆمپانیایەکی ئەمریکی

ئاڤا نیوز

 

ئەنجوومەنی وەزیرانی عێراق پڕۆژەی نۆژەنکردنەوە، فراوانکردن و بەڕێوەبردنی فڕۆکەخانەی نێودەوڵەتی بەغدای دایە کۆمپانیایەکی ئەمریکی، کۆمپانیاکەش بەبەهای 764 ملیۆن دۆلار پارە لە فڕۆکەخانەکەدا خەرج دەکات و 43%ـی داهاتی ساڵانەی فڕۆکەخانەکەش بۆ حکومەت دەبێت.

 

وێنە گەورەکە: حکومەتی عێراق دەڵێت، بوونی کۆمپانیا نێودەوڵەتییەکانی بواری فڕۆکەوانی لە فڕۆکەخانەی نێودەوڵەتی بەغدا پاشەکشەی کردووە و فڕۆکەخانەکەش پێویستی بە گەشەپێدانی زیاتر هەیە و ئەوەشی خەرجییەکی زۆری دەوێت، بۆیە بڕیاریدا ئەم کارە بە کەرتی تایبەت و بە کۆمپانیایەکی جیهانی تایبەتمەند بەم بوارە بسپێرێت.

 

ڕاگەیێنراوی فەرمی: ئەنجوومەنی وەزیرانی عێراق لە کۆبوونەوەی ڕۆژی سێشەممەیدا پڕۆژەی نۆژەنکردنەوە، گەشەپێدان و بەڕێوەبردنی فڕۆکەخانەی نێودەوڵەتیی بەغدا بە هاوپەیمانیی وەبەرهێنانی کاپ (CAAP) بەخشی کە لە هەردوو کۆمپانیای کۆربروسیۆنی ئەمریکی بۆ فڕۆکەوانی و ئەمواجی جیهانی پێکهاتووە، بەگوێرەی گرێبەستەکەش لایەنی وەبەرهێنەر بەبەهای 764 ملیۆن دۆلار کار لە فڕۆکەخانەکەدا دەکات واتە حکومەتی عێراق هیچ پارەیەک لەم پڕۆژەیەدا خەرج ناکات، لە بەرامبەریشدا 43.05%ـی داهاتی ساڵانەی فڕۆکەخانەکە بۆ حکومەت دەبێت.

 

بەگوێرەی گرێبەستەکە فڕۆکەخانەی نێودەوڵەتیی بەغدا بەگوێرەی پێوەرە نێودەوڵەتییەکان فراوان دەکرێت و لە قۆناغی یەکەمدا ساڵانە دەتوانێت نۆ ملیۆن گەشتیار بگوازێتەوە لە قۆناغی دووەمیشدا توانای فڕۆکەخانەکە دەگاتە ساڵانە گواستنەوەی 15 ملیۆن گەشتیار، هەروەها گۆڕەپانی فڕۆکەخانە فراوانتر دەکرێت و سەرجەم بەشەکانی نۆژەن دەکرێنەوە و 15 پردیش بۆ ئاسانکاری گواستنەوەی گەشتیاران لەسەر ڕێگاکانی فڕۆکەخانە دروست دەکرێن.

 

بەگوێرەی خاڵێکی دیکەی ڕێککەوتنەکە لایەنی وەبەرهێنەر مووچەی کارمەندانی فڕۆکەخانەکە دابین دەکات و بۆ زیادبوونی هەر ملیۆنێک گەشتیاریش، (1000) هەلی کاری ڕاستەوخۆ دەڕەخسێنێت.

 

نووسینگەی سەرۆکوەزیرانی عێراق دەڵێت، ئەم گرێبەستە لەدوای ساڵی 2006ەوە یەکێکە لە باشترین گرێبەستەکانی وەبەرهێنان لە ڕوانگەی سوودی بۆ خەزێنەی دەوڵەت، لەکاتێکدا حکومەتەکانی پێشوو فڕۆکەخانەکانی نەجەف و کەربەلا و کەرکووکیان داوە بە وەبەرهێنان بەبێ ئەوەی هیچ داهاتێکی بۆ دەوڵەت تێدابووبێت.