بەدواداچوونی ئاڤا؛ لە زیقار کاندیدانی ئافرەت ناتوانن بانگەشە بکەن

ئاڤا نیوز

 

بەهۆی سرووشتی کۆمەڵایەتی خەڵک لە باشووری عێراق و بەدیاریکراوی لە پارێزگای زیقار، کاندیدانی ئافرەت بە ئاسانی ناتوانن بانگەشە بۆ خۆیان بکەن و بەشێکیان دەڵێن، "پۆستەرەکانیان دەشێوێنرێت و بەهۆی ترس و گاڵتەپێکردنیشەوە، تەنیا لە ناوەندی شارەکان بانگەشە دەکەن".

 

وێنە گەورەکە: پارێزگای زیقار لە پەرلەمانی عێراق 19 کورسی هەیە و بەگوێرەی سیستمی کۆتا لانیکەم دەبێت پێنج ئافرەت بۆ پەرلەمان سەربکەون، بۆ ئەم هەڵبژاردنەش 153 ئافرەت خۆیان کاندید کردووە. 

 

لێدوانی فەرمی: هەیفا ئەمین، کاندیدی هاوپەیمانیی مەدەنیی دیموکراسی لە زیقار بە ئاڤا میدیای ڕاگەیاند، زیانگەیاندن بە پۆستەری بانگەشەی کاندیدانی ئافرەت تازە نییە و لەوانەشە مەبەستی سیاسی لە پشت ئەم بابەتەوە بێت بۆ شکاندنیان، هەروەها ئەوەی بەرامبەریان دەکرێت جیاکارییە دژ بە ئافرەتان.

 

گۆشەیەکی دیکەی دیمەنەکە: لای خۆیەوە دەلال رکابی، کاندیدی هاوپەیمانیی ئاوەدانکردنەوە و گەشەپێدان بۆ ئاڤا وتی، "منیش پۆستەری بانگەشەکانم تێکدراون یان پۆستەری دیکەیان لەسەر دانراون، ئەوەش بەهۆکاری ئەوەیە کە من کاندیدێکی جەماوەرییم و ئەوانەی ئەو کارانە دەکەن دیارە لە کاندیدبوونی من زیانمەند بوون".

 

بەگوێرەی ڕێنمایی کۆمیسیۆن هەر کەسێک پۆستەری کاندیدەکان بشێوێنێت و زیانیان پێبگەیێنێت، بە سزای ملیۆنێک تا پێنج ملیۆن دینار یان مانگێک بۆ یەک ساڵ زیندانیکردن، سزا دەدرێت.

 

زانیاریی زیاتر: ڕزاق عوبێد، بەڕێوەبەری ناوەندی تەممووز بۆ چاودێریی هەڵبژاردنەکان بۆ ئاڤا وتی، لێکردنەوە و زیانگەیاندن بە پۆستەری کاندیدانی ئافرەت لە پارێزگاکانی باشوور پەیوەندی بە تایبەتمەندی کۆمەڵگاکانیانەوە هەیە، بەجۆرێک کاندیدانی ئافرەت لەترسی گاڵتەپێکردن و زیانگەیاندن، پۆستەرەکانیان تەنیا لە ناوەندی شارەکان هەڵدەواسن و لە قەزا و ناحییەکان پۆستەر کەمترییان دەبینرێت.

 

لای خۆیەوە نەتەوەیەکگرتووەکان چەندین بەرنامەی ڕاهێنانی بۆ بەهێزکردنی ڕۆڵی ئافرەتان لە هەڵبژاردنەکان پێشکەش کردووە، بەڵام وەک چاودێرانی هەڵبژاردن دەڵێن، کاندیدانی ئافرەت بەهۆی ئەوەی سەرنجیان لەسەر بانگەشەیە لە ناوەندی شارەکان بۆیە دەرفەتی گەیشتنیان بە دەنگدەران ئاسانترە، بەڵام تا بچنە دەرەوەی شارەکان بانگەشەکانیان لاوازتر دەبێت.