عوسمان هەورامی تابلۆی ڕێزلێنانی پێ دەبەخشرێت

ئاڤا نیوز

 

عوسمان هەورامی، هونەرمەند و مامۆستای سیاچەمانەی دەڤەری هەورامان لەلایەن وەزیری ڕۆشنبیریی ئێرانەوە تابلۆی ڕێزلێنانی پێ بەخشرا.

 

چیرۆکی سەرەکی: عوسمان هەورامی، کە لە دەڤەری هەورامان و کوردستان بە "بولبولی هەورامان یان باوکی سیاچەمانە" ناسراوە، لە سەردانێکیدا بۆ شاری سنەی ڕۆژهەڵاتی کوردستان لەلایەن سەید عەباس ساڵحی، وەزیری ڕۆشنبیریی ئێران و ئارەش لهۆنی، پارێزگاری سنە پێشوازیی لێکرا.

 

ئەوەی پێویستە بیزانیت: لە دیدارێکیدا لەگەڵ هەریەک لە وەزیری ڕۆشنبیریی ئێران و پارێزگاری سنە، عوسمان هەورامی لەپای خزمەت و پاراستنی ڕۆشنبیری و زمانی کوردی بە تایبەت کولتوور، هونەر و مۆسیقای دەڤەری هەورامان، ڕێزلێنانی پێ بەخشرا و ستایشی ڕۆڵی کرا لە پاراستنی فۆلکلۆر و هونەری گۆرانی بە تایبەت سیاچەمانە، وەزیری ڕۆشنبیری هیوای خواست ڕێبازی هونەریی هەورامان لەسەر دەستی ئەو کەسانەی مامۆستا عوسمان فێری کردوون، درێژەی پێ بدرێت.

 

لەلایەکی دیکەوە: لە بەرامبەر ڕێزلێنان و ستایشکردنەکەیدا هونەرمەند عوسمان هەورامی، وەک نیشانەی ڕێز و دۆستایەتی جووتێک كڵاشی ڕەسەنی هەورامانی پێشکەش بە وەزیری ڕۆشنبیریی ئێران کرد.

 

خاڵە ئەرێنییەکان: لە دیدارەکەدا وەزیری ڕۆشنبیریی ئێران گوتی، هونەر و مۆسیقای هەورامان هاوشانی سروشتە جوانەکەی لە دڵی خەڵک جێگەی خۆی کردووەتەوە و  مامۆستا عوسمان هەورامی تەنیا هونەرمەندێکی بەتوانا نییە، بەڵکو خاوەن کەسایەتییەکی جەماوەری و خۆشەویستی خەڵکە.

 

باکگراوند: هونەرمەند عوسمان هەورامی لە ساڵی 1935 لە گوندی كێمنەی سەر بە شاری پاوەی هەورمانی ڕۆژهەڵاتی کوردستان لەدایکبووە و تا ئێستا زیاتر لە 700 گۆرانیی تۆمار کردووە، لەبەر لێهاتوویی و شارەزایی لە گوتنی سیاچەمانەدا بە "باوکی سیاچەمانە" ناسراوە.