پێشەوا هەورامانی: هەوڵ بۆ ئەوە دەدەین پێش هەڵبژاردن مووچەیەکی دیکە دابەش بکرێت

ئاڤا نیوز

گوتەبێژی حکومەتی هەرێمی کوردستان لەبارەی ناردنی مووچەی فەرمانبەرانەوە ڕایگەیاند: هەموو هەوڵێکی خۆمان دەدەین هیچ بیانوویەک بۆ بەغدا نەهێڵێنەوە.

چیرۆکی سەرەکی: هەرێمی کوردستان سەرجەم پابەندییەکانی خۆی بەرامبەر بەغدا جێبەجێکردووە، چاوەڕوان دەکرێت پێش هەڵبژاردن میزان موراجەعە و 120 ملیاری داهاتی نانەوتیش بۆ بەغدا بنێرێت، بەو ئامانجەی پێش 11ـی 11 کە ڕۆژی هەڵبژاردنە، مووچەی مانگی نۆ بنێردرێت."

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان، لە میانی کردنەوەی پڕۆژەی پشتێنەی سەوزایی  بە ئاڤای ڕاگەیاند: کاروانی ئاوەدانیی بەردەوامە و سەرۆکوەزیرانی هەرێمی کوردستان بە ئەقڵییەتێکی  دەوڵەتداری سەیری  بونیاتنانی هەرێمی کوردستان و پڕۆژەکان دەکات، پڕۆژەی پشتێنەی سەوزایی کاریگەرییەکی گەورەی ژینگەیی لە ناوچەکە دروست دەکات.

سەبارەت بە مووچەی فەرمانبەران، گوتەبێژی حکومەتی هەرێمی کوردستان ڕایگەیاند: هەموو هەوڵێکی خۆمان دەدەین هیچ بیانوویەک بۆ بەغدا نەهێڵێنەوە و بە خێرایی کارەکانی سەرشانمان جێبەجێ دەکەین بۆ ئەوەی کێشەی مووچە چارەسەر بکرێت، ئەمەش بۆ ئەوەی پێش هەڵبژاردن مووچەیەکی دیکە دابەش بکرێت.