کۆمیسیۆن: ملیۆنێک و 313 هەزار کەس لە دەنگدانی تایبەت دەنگ دەدەن

ئاڤا نیوز

کۆمیسیۆنی هەڵبژاردنەکانی عێراق ڕایگەیاند، ڕۆژی 9ی مانگی داهاتوو دەنگدانی تایبەت بۆ هەڵبژاردنی پەرلەمانی عێراق بەڕێوەدەچێت و تیایدا ملیۆنێک و 313 هەزار و 859 کەس دەنگدەدەن، کاتژمێر 7:00ـی بەیانی ڕۆژی 8ی تشرینی یەکەمیش واتە 24 کاتژمێر پێش دەنگدانی تایبەت، بانگەشەی هەڵبژاردن کۆتایی دێت و ماوەی بێدەنگی هەڵبژاردن دەستپێدەکات.

وێنە گەورەکە: بڕیارە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، لەم هەڵبژاردنە 21 ملیۆن و 404 هەزار و 291 کەس مافی دەنگدانیان هەیە و حەوت هەزار و 754 کاندیدیش کێبڕکێ لەسەر 329 کورسییەکەی پەرلەمان دەکەن.

لێدوانی فەرمی: جومانە غەڵای، وتەبێژی کۆمیسیۆنی هەڵبژاردنەکانی عێراق بە ئاژانسی هەواڵی فەرمی ڕاگەیاند، کاتژمێر 7:00ـی بەیانی ڕۆژی 9ی تشرینی یەکەم دەنگدانی تایبەت دەستپێدەکات و تیایدا ئەندامانی دەستەی دەروازە سنوورییەکان، وەزارەتەکانی ناوخۆی عێراق و کوردستان، دەزگای دژەتیرۆر، وەزارەتی پێشمەرگە، بەرگری و دەستەی حەشدی شەعبی دەنگ دەدەن، کە ژمارەیان ملیۆنێک و313 هەزار و 859 دەنگدەرە.

وتیشی، کاتژمێر 7:00ـی بەیانی ڕۆژی 8ی تشرینی یەکەم واتە 24 کاتژمێر پێش دەنگدانی تایبەت، ماوەی بێدەنگی هەڵبژاردنە و بانگەشەی هەڵبژاردن بە هەموو شێوەیەک ڕادەگیرێت، هەر لایەنێکیش لە ماوەی بێدەنگی هەڵبژاردن بانگەشەی بکات ڕێکاری یاسایی لەدژی دەگیرێتەبەر.