سەدر ڕوونکردنەوەیەک لەبارەی نانەوەی ئاژاوە لە ڕۆژی دەنگدان دەدات

ئاڤا نیوز

ڕێبەری ڕەوتی نیشتمانیی شیعە، ڕوونکردنەوە لەبارەی بوونی پیلانێک بۆ تێکدانی ناوەندەکانی دەنگدان، سووتاندنی سندووقەکانی هەڵبژاردن و تێکدانی ئاسایش و سەقامگیریی ڕۆژی هەڵبژاردنەکانی پەرلەمانی عێراق دەدات.

وێنە گەورەکە: بڕیارە 11ـی تشرینی دووەم هەڵبژاردنی خولی شەشەمی پەرلەمانی عێراق بەڕێوەبچێت، ڕەوتی نیشتمانیی شیعە بە ڕابەرایەتی موقتەدا سەدر بڕیاریداوە بایکۆتی هەڵبژاردن بکەن.

بڵاوکراوەی فەرمی: موقتەدا سەدر لە وەڵامی هەواڵێکدا کە لەلایەن یەکێک لە لایەنگرانی بزووتنەوەکەیەوە بڵاوکرابووەوە و گەیشتبووە دەستی، جەختی کردەوە کە بزووتنەوەکەی هیچ پەیوەندییەکی بە پلانێکەوە نییە بۆ تێکدانی پڕۆسەی هەڵبژاردن و سەدر دەڵێت: "هەر کەسێک ئەو کارە بکات، لە ئێمە نییە."

لەهەمان کاتدا: سەدر ئەو هەواڵانەی بە "درۆی گەندەڵکاران" ناوبرد کە دەیانەوێت ئەنجامی بدەن و پاشان بیدەنە پاڵ ڕەوتەکەی، وتیشی: "ئێمە لەوە بێبەریین."