مارک ساڤایا: هاریکاریی دەسەڵاتە فیدراڵی و هەرێمییەکانی عێراق بۆ ئاسایش و ئابووری زۆر گرنگە

ئاڤا نیوز

مارک ساڤایا، نێرده‌ی تایبه‌تی سه‌رۆكی ئه‌مریكا له‌ عێراق، پشتیوانیی ئەمریکا بۆ سەقامگیری و سەروەری و خۆشگوزەرانی عێراق دەردەبڕێت و دەشڵێت: دەبێت عێراق هەنگاوی زیاتر بۆ سەربەخۆیی و دوورکەوتنەوە لە دەستوەردانی ئێران بنێت. ئەو هەروەها دەڵێت، دەبێت هێزە چەکدارییەکان لە ژێر دەستەڵاتی حکومەتدا بن. 

ڕاگەیێنراوی فەرمی: ساڤایا لە تۆڕی کۆمەڵایەتیی ئێکس، ڕایگەیاندووە:

• لە ماوەی سێ ساڵی ڕابردوودا عێراق هەنگاوی بۆ سەربەخۆیی و دوورکەوتنەوەی لە ئێران، گێڕانەوەی کۆنترۆڵی چەک بۆ ژێر دەستی دەوڵەت و گەشەکردنی ئابووری ناوە، بەڵام هێشتا کارەکە تەواو نەبووە.

• ئەمریکا بە ڕوونی ڕایگەیاندووە کە گرووپە چەکدارەکانی دەرەوەی دەسەڵاتی دەوڵەت هیچ شوێنێکیان بۆ نابێت. سەقامگیری، خۆشگوزەرانی، سەروەری و پێشکەوتنی عێراق پێویستیی بەوە هەیە کە هیزە ئەمنییەکان لە ژێر دەستەڵاتی حکومەتدا بن.

• بەرژەوەندیی عێراق و ناوچەکە لە سەربەخۆیی عێراق و نەبوونی دەستوەردانی ئێران و بریکارەکانیدایە. 

• یەکێتی و هاریکاریی نێوان دەسەڵاتە فیدراڵی و هەرێمییەکانی عێراق زۆر گرنگە بۆ دڵنیابوون لە ئاسایشی بەردەوام، گەشەی ئابووری و یەکگرتوویی نیشتیمانی.

• نابێت عێراق بۆ ڕابردوو بگەڕێتەوە یان ئەو ڕێگایانە پەیڕەو بکات کە دەبنە کۆسپ بۆ پێشکەوتن و یەکێتی.

• عێراق گرنگییەکی زۆری هەیە بۆ ناوچەکە و ئەمریکا و وەک یەکێک لە بەهێزترین و بەنرخترین هاوبەشەکانی ئەمریکا دەمێنێتەوە.

ئەمەش بزانە: ئەمە یەکەمین بەیاننامەی فەرمیی ساڤایایە لە دوای دەستبەکاربوونی وەک نێردەی سەرۆکی ئەمریکا بۆ عێراق.