سامەڕایی سەرزەنشتی حەلبووسی دەکات

ئاڤا نیوز

سەرۆکی هاوپەیمانیی عەزم، سەرزەنشتی حەلبووسی دەکات و ڕایدەگەیێنێت، "دەستبەرداری وەزارەتی پەروەردە بوون چونکە هەژارە, بەدوای وەزارەتە ملیارییەکاندا دەگەڕێن".

چیرۆکی سەرەکی: لە چوارچێوەی بانگەشەی هەڵبژاردندا لە پارێزگای ئەنبار، موسەننا سامەڕایی، سەرۆکی هاوپەیمانیی عەزم، پەیامێکی "سەرزەنشتکردن"ی ئاڕاستەی محەممەد حەلبووسی، سەرۆکی پێشووی پەرلەمان کرد.

لێدوانی فەرمی: سامەڕایی بە ئاماژەکردن بە حەلبووسی، گوتی: "پەیامی من بۆ سیاسییەکە کە زۆر بایەخ بە وەزارەتی پەروەردە دەدات، خۆزگە گرنگیمان بە پرسی بێسەروشوێنەکان لە سەقڵاویە و ناوچەکانی دیکە بدایە، کێبڕکێکەمان لەسەر ئەوە بووایە کێ زیاتر خزمەتی هاووڵاتیانی وڵاتەکەی دەکات، نەک کێ ئەوی دیکە دەخات."

لەهەمان کاتدا: سامەڕایی ڕەخنەی تووندی لە وەزارەتەکانی حزبی "تەقەدووم" گرت و گوتی: " ئێمە وەزیرێکمان نەهێنا قوتابخانەکان بە وێرانی بەجێبهێڵێت، وەزیرێکمان نەهێناوە دزە بە پرسیارەکانی تاقیکردنەوە بکات و بەهۆیەوە ببینە گاڵتەجاڕی وڵاتان. وەزارەتەکانتان گەندەڵییەکی زۆریان تێدایە و ئێوە بێ هۆکار دەستبەرداری وەزارەتی پەروەردە نەبوون، بەڵکو لەبەر ئەوەی لە ڕووی تەرخانکردنی بودجەوە هەژارە و ملیارەکانی تێدا نییە."

قووڵتر: سامەڕایی قسەکانی بەم شێوەیە کۆتایی پێهێنا: "ئێوە بەدوای وەزارەتە ملیارییەکاندا دەگەڕێن، بەڵام پەروەردە وەزارەتێکی هەژارە و بۆیە دەستبەرداری بوون، ئەوەی ماڵەکەی لە شووشە بێت، نابێت بەرد لە ماڵی خەڵک بگرێت".