ئێران سێ كەس بە تۆمەتی پەیوەندییان بە داعشەوە دەستگیر دەكات

ئاڤا نیوز

ئێران دەستگیرکردنی سێ كەسی بەتۆمەتی بوونى پەیوەندی بە داعشەوەڕاگەیاند، بە گوتەی پۆلیس دەستگیرکراوەکان پلانی هێرشیان لە ڕۆژانی جەژندا هەبووە. 

بڵاوكراوەی فەرمی: بە گوێرەی میدیا ئێرانییەكان، گومانلێکراوەکان لە شاری کەرەج، لە پارێزگای ئەلبورز دەستگیر کراون و لە ناویشیاندا "ئەندامێکی باڵای داعش" بە ناوی محەممەد زاکیر هەیە. هیچ زانیارییەکی دیکە لە سەر دەستگیرکراوەکان ڕانەگەیێنراوە و هێشتا نازانرێت کە ئەوانە ئێرانین یان هەڵگری ڕەگەزنامەی وڵاتی دیکەن. 

زانیاریی زیاتر: ئێران هەروەها دەستگیرکردنی هەشت کەسی دیکەی ڕاگەیاندووە کە گومان دەکرێت لە پلانی ئەو سێ کەسەوە تێوەگلابن. هاوکات ڕۆژی پێنجشەممەی ڕابردووش دەستگیرکردنی دوو کەسی دیکەی بە گومانی داعشبوون لە قوم ڕاگەیاند.

ئەوەی پێویستە بیزانیت: داعش بەرپرسیارێتی خۆی لە تەقینەوەکانی مانگی کانوونی دووەمی ئەمساڵ لە کرمان ڕاگەیاند کە بە هۆیەوە لانیکەم 90 کەس لە ڕێوڕەسمی ساڵیادی کوژرانی قاسم سلێمانی، فەرماندەی سوپای قودس، کوژران.