سەرۆکی پەرلەمانی تورکیا: زەمینەسازیی یاسایی بۆ پرۆسەی ئاشتی دەڕەخسێنین

ئاڤا نیوز

سەرۆکی پەرلەمانی تورکیا ڕایگەیاند، چ کاتێک هێزە ئەمنییەکانی تورکیا بۆیان دەرکەوت پەکەکە خۆی هەڵوەشاندووەتەوە، پاکێجی ڕەخساندنی زەمینەسازیی یاسایی بۆ سەرخستی پرۆسەی ئاشتی دەبەنە پەرلەمان.

وێنە گەورەکە: سێشەممەی ڕابردوو، پەکەکە کشانەوەی هێزەکانی لە تورکیا و باکووری کوردستان ڕاگەیاند و بەرپرسانی دەم پارتی و پەکەکەش دەڵێن، تۆپەکە لە گۆڕەپانی تورکیادایە و گەیشتوونەتە قۆناغی دووەمی پرۆسەکە کاتی هاتووە زەمینەسازیی یاسایی بۆ پرۆسەکە بڕەخسێنرێت.

لێدوانی فەرمی: نوعمان کورتوڵموش، سەرۆکی پەرلەمانی تورکیا ڕایگەیاند، لە قۆناغی ئامادەکردنی ڕاپۆرتی کۆتایی نزیکبوونەتەوە  و دەڵێت: پەرلەمانی تورکیا زەمینەی یاسایی بۆ پرۆسەکە دەڕەخسێنێت.

بەتەنیشت ئەم بابەتەوە: سەرۆکی پەرلەمانی تورکیا بڕیاری پەکەکەی بۆ کشاندنەوەی هێزەکانی لە تورکیا و باکووری کوردستان بە گرنگ زانی و ئاماژەی بەوە دا ئەرکی سەرەکیی کۆمیسیۆنەکە پێشکەشکردنی پاکێجێکی گشتییە بە پەرلەمان، نەک ئامادەکردنی یەک بە یەک دەقی پڕۆژەیاساکان بۆ هەموارکردنەوە.

ئەوەی پێویستە بیزانیت: بەهۆی ئامادەبوونی وەزیرانی دەرەوە و دادی تورکیا، کۆبوونەوەکەی ئەمڕۆ دوور لە چاوی کامێراکان ئەنجام درا. لە بەشی یەکەمی کۆبوونەوەکەدا هاکان فیدان، وەزیری دەرەوە وەڵامی پرسیارەکانی پەیوەندیدار بە دوایین پێشهاتەکانی بە پرۆسەکە و لە بەشی دووەمیشدا یڵماز تونچ، وەزیری دادی تورکیا وەڵامی پرسیارەکانی لەبارەی چۆنیەتی هەموارکردنەوەی یاساکان بۆ ڕەخساندنی زەمینەسازی یاسایی بۆ پرۆسەکە دایەوە.

لەلایەکی دیکەوە: هەر لە سەرەتای ئەم پرۆسەیە دەم پارتی کۆی داواکارییەکانی بۆ هەموارکردنەوەی یاساکان لە 12 خاڵدا چڕکردەوە، کە گرنگترینیان ئازادکردنی سەڵاحەدین دەمیرتاش و زیندانییانی سیاسی و زیندانییە نەخۆشەکان، پێدانی مافی هیوا و ئازادکردنی ئۆجەلان بە مەرج، ئازادکردنی ئەو زیندانییانەی ماوەی حوکمدانیان تەواو بووە، خوێندن بە زمانی دایکن.