دۆسیەی خانەنشینی سەرجەم پێشمەرگە و پلە تایبەتەکان تەواو دەکرێن

ئاڤا نیوز

وەزارەتی پێشمەرگە چاوەڕێی فەرمانی هەرێمی لە سەرۆکایەتی هەرێمی کوردستان دەکات، بۆ ئەوەی دەست بە کارکردن لە دۆسیەی ژمارەیەک خانەنشینی دیکە بکات و مووچەیان بۆ ببەسترێت.

وێنە گەورەکە: لە ناوەڕاستی ساڵی ڕابردووەوە تا ئێستا هەزاران پلەدار و پێشمەرگە تەمەنیان گەیشتووەتە خانەنشینی، ئەوانەی ساڵی ڕابردوو دۆسییەکانیان بەپێی یاسای خانەنشینی پێشمەرگە ژمارە 38ـی ساڵی 2007 ڕەوانە دەکرێن، بەڵام ئەوانەی ئەمساڵ بەپێی یاسای خانەنشینی یەكگرتووی عێراق ژمارە 9ـی ساڵی 2014 خانەنشین دەکرێن.

لێدوانی فەرمی: حاجی مەلا ئەمین، بەڕێوەبەری گشتیی خانەنشینی پێشمەرگە و کەمئەندامان لە وەزارەتی پێشمەرگە بە ئاڤای گوت،  لەسەرەتای ئەمساڵەوە نزیکەی 7 هەزار پێشمەرگە و پلە تایبەت گەیشتوونە تەمەنی خانەنشینی، دۆسیەی بەشێکی زۆریان تەواو بووە، نزیکەی دوو هەزار کەس ماون، کە زۆرینەیان پلە تایبەتن ئێستا لە سەرۆکایەتی هەرێمی کوردستانە، بڕیارە هەفتەی داهاتوو فەرمانی هەرێمیان بۆ بگەڕێتەوە و پرۆسەی خانەنشینیان دەستپێدەکات."

گوتیشی، "ئەگەر هەفتەی داهاتوو فەرمانی هەرێمی بۆ پلە تایبەتەکان بگەڕێتەوە، ئەوا لەگەڵ لیستی مووچەی مانگی 11 مووچەی خانەنشینیان بۆ دەبەسرێت و هەموو مووچەکانیان بەیەکەوە وەردەگرن."

ئەمەش بزانە: ئەو پێشمەرگانەی تاوەکو 31-12-2024، تەمەنیان گەیشتووەتە خانەنشینی، ناویان دەخرێتە لیستی مووچە و دەنێردرێت بۆ بەغدا، تەرخانی داراییان بۆ کراوە و مووچەیان بۆ دەبەسترێت، تاوەکو ئێستا دۆسیەی نزیکەی 5 هەزاریان تەواوبووە، بەشێکیان مووچەکانیان وەرگرتووە و هەزار و 530 ـی دیکەیش لەگەڵ دابەشکردنی مووچەی مانگەکانی نۆ و 10 مووچەی خانەنشینیان وەردەگرن.