د. ڕۆژان بەرزنجی: پێویستە كورد منداڵی زیاتر بخاتەوە

ئاڤا نیوز

 
پسپۆرێکی نەخۆشییەکانی ژنان و لەدایکبوون، بەپێویستی دەزانێت حکومەت پاڵپشتی زیاتری دایکان بکات بۆ ئەوەی ڕێژەی دانیشتووان بەرزببێتەوە.

بۆچی گرنگە: ڕێژەی گەشەی دانیشتووان لە پارێزگاکانی هەرێمی کوردستان بەراورد بە پارێزگاکانی دیکەی عێراق کەمترە، لە داهاتوودا ئەم کەمبوونەوەیە کاریگەری لەسەر پێگەی کورد دەبێت، چ لە نێوخۆی هەرێمی کوردستان و چ لە ناوچەکانی دەرەوەی ئیدارەی هەرێمی کوردستانیش.

لێدوانی فەرمی: د. ڕۆژان شێخ خاڵس بەرزنجی، پسپۆری نەخۆشییەکانی ژنان و لەدایکبوون لە چاوپێکەوتنێکدا لەگەڵ ڕۆژان ئەبوبەکر، پێشکەشکاری بەناوبانگی ئاڤا میدیا کە شەوی شەممە 06-04-2024 کاتژمێر 10:00 بڵاودەکرێتەوە، ڕایگەیاند: نەتەوەی کورد، نەتەوەیەکی هۆشیار و زیرەکە و پێویستە ژمارەمان زیاد بێت و منداڵی زیاتر بخەینەوە".

 

چارەسەر: د. ڕۆژان بەپێویستی دەزانێت حکومەت پاڵپشتی دایکان بکات، بەتایبەت ئەوانەی فەرمانبەری حکومەتن، لە کاتی وەرگرتنی مۆڵەتی دایکایەتی مووچەیەکی باشیان پێبدرێت و پارەیەکی زۆریان لێ نەبڕێت.

ئەوەی پێویستە بیزانیت: ساڵی 2003 ڕێژەی خێزان لە هەرێمی کوردستان بە تێکڕا بە هەشت کەس خەمڵێنراوە، بەڵام دوای زیاتر لە 20 ساڵ ئێستا بۆ پێنج کەس دابەزیوە.