مەسرور بارزانی بەڵێنی نۆژەنکردنەوەی یاریگای شەقڵاوە دەدات

ئاڤا نیوز

بەڵێنێکی مەسرور بارزانی بۆ نۆژەنکردنەوەی یاریگای تۆپی پێی شەقڵاوە وەرزشوانانی سنوورەکە دڵخۆش دەکات و سەرۆکی یانەی شەقڵاوەش لەڕێگەی ئاڤا میدیا زانیاریی ورد لەبارەی یاریگاکە ئاشکرا دەکات.

چیرۆکی سەرەکی: ئەمرۆ یەکشەممە 2-11-2025، مەسرور بارزانی، جێگری سەرۆکی پارتی، لە شەقڵاوە بەشداری لە کەرنەڤاڵی بانگەشەی پارتی کرد، لەبارەی یاریگای شەقڵاوە گوتی: دەزانم ئەو یاریگایە پێویستی بە نۆژەنکردنەوە هەیە و بۆتان نۆژەن دەکەینەوە.

لێدوانی فەرمی: عوسمان خۆشناو، سەرۆکی یانەی وەرزشیی شەقڵاوە بە ئاڤای ڕاگەیاند: یاریگاکەمان تێکچووە و پێویستیی بە نۆژەنکردنەوەی تەواوەتی هەیە، چونکە یانەی وەرزشیی شەقڵاوە، کۆلێژی پەروەردەی وەرزشیی شەقڵاوە، پەیمانگەی پەروەردەی وەرزشی و نزیکەی 45 تیپی میللی و فێرگەکان لە سەنتەری قەزاکە، ناحیەکانی باسرمە، بالیسان، هیران و شارەدێی کۆڕێ پشتی پی دەبەستن و یاریی تێدا دەکەن، بۆیە بەڵێنەکەی مەسرور بارزانی بە دەستکەوتێکی زۆر گەورە دادەنێین بۆ سەرجەم وەرزشوانانی دەڤەرەکە.

زانیاریی زیاتر: بە گوتەی سەرۆکی یانەی وەرزشیی شەقڵاوە، یاریگەکەیان نزیکەی پێنج هەزار هاندەر دەگرێت و چیمەنەکەشی دەستکردە، ئەو یانانەشی یارییان لەگەڵ دەکەین، گلەیی لە خراپی یاریگاکەمان دەکەن، تەنانەت بەشی گۆڕەپان و مەیدانەکەی بە کەڵک نەماوە.

باکگراوند: یاریگای شەقڵاوە لە ساڵی 1998 دروستکراوە، لە ساڵی 2014 دەستکارییەکی زۆر کەم لە یاریگاکە کراوە و چیمەنەکەی لە سرووشتییەوە گۆڕدرا بۆ چیمەنی دەستکرد.