سەرۆککۆمار داوای سیاسەتێکی دادپەروەرانە بۆ دابەشکردنی ئاوی دیجلە و فورات دەکات

ئاڤا نیوز

سەرۆککۆماری عێراق، داوای سیاسەتێکی دادپەروەرانە دەکات بۆ دابەشکردنی پشکی ئاو کە مافەکانی عێراق لە ڕووبارەکانی دیجلە و فوراتدا بپارێزێت.

چیرۆکی سەرەکی: ڕۆژی یەکشەممە، عەبدوللەتیف جەمال ڕەشید، سەرۆککۆماری عێراق، پێشوازی لە هاکان فیدان، وەزیری دەرەوەی تورکیا و شاندێکی یاوەری کرد، بە ئامادەبوونی فوئاد حوسێن، جێگری سەرۆکوەزیران و وەزیری دەرەوەی عێراق. لە دیدارەکەدا گفتوگۆ لەبارەی پەیوەندییە دووقۆڵییەکان لە بوارە جیاوازەکان و پرسی هاوبەش کرا.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆککۆماری عێراق، سەرۆککۆمار جەختی لە پابەندبوونی عێراق بە سیاسەتی کراوەیی، دروستکردنی هاوبەشی و پەیوەندی دراوسێیەتی باش لەگەڵ وڵاتانی ناوچەکە و جیهان کردەوە، داواشی کرد "سیاسەتێکی دادپەروەرانە بۆ پشکە ئاوییەکان پەیڕەو بکرێت کە مافەکانی عێراق لە دیجلە و فوراتدا بپارێزێت."

لەلایەکی دیکەوە: وەزیری دەرەوەی تورکیا جەختی لە گرنگیی وڵاتەکەی بۆ بەهێزکردنی پەیوەندییەکان و کردنەوەی ئاسۆ نوێیەکانی هاوکاری لەگەڵ عێراق کردەوە.