بەڕێوەبەری فڕۆكەخانەی سلێمانی: لە داهاتوویەكی نزیكدا گەشتی ڕاستەوخۆمان بۆ وڵاتانی ئەوروپا دەبێت

ئاڤا نیوز

دواى زیاتر لە دوو ساڵ لە سەپاندنی قەدەغەی گەشت لە فڕۆكەخانەی سلێمانییەوە بۆ توركیا، بەرەبەیانی ئەمڕۆ یەكەم فڕۆكەی هێڵی ئاسمانیی توركیش ئێرلاین لە فڕۆكەخانەی نێودەوڵەتیی سلێمانی نیشتەوە، هەمان فڕۆكە كاتژمێرێك دواتر بەرەو ئیستەنبوڵ فڕی. بەڕێوەبەری فڕۆكەخانەی نێودەوڵەتیی سلێمانیش دەڵێت، لە داهاتوویەكی نزیكدا گەشتی ڕاستەوخۆمان بەرەو وڵاتانی ئەوروپا دەبێت.

چیرۆكی سەرەكی: دوای بڕیاری دەستپێکردنەوەی گەشتەکان، بەرەبەیانی ئەمڕۆ کاتژمێر 1:10 خولەك، یەکەم فڕۆکەی هێلی ئاسمانی تورکش ئێرلاین لە فڕۆکەخانەی سلێمانی نیشتەوە، هەر ئەمشەو دوای مانەوەی زیاتر لە کاتژمێرک لە فڕۆکەخانەی سلێمانی، لە کاتژمێر 2:40 خولەك هەمان فڕۆكە بەرەو ئیستەنبووڵ بەرێکەوتەوە، ئەوەش یەکەم گەشتە دوای ڕاگیرانی گەشتەکان لەو ماوەیەدا.

لێدوانی فەرمی: ڕێباز محەممەد، بەڕێوەبەری گشتیی فڕۆکەخانەی سلێمانی، لە کۆنفرانسێکی رۆژنامەوانیدا ڕایگەیاند، ئێستا ئاسمانی تورکیا بەڕووی سلێمانیدا کراوەیە، تورکیش ئێرلاین یەکەم هێڵە و لە ئایندەیەکی نزیکدا هێڵێکی دیکە بە تێچوویەکی کەمتر گەشتەکانی نێوان سلێمانی و تورکیا وەردەگرێت، بە گوێرەی خشتەی گەشتەکان هەفتانە چوار گەشت لەنێوان سلێمانی و ئیستانبوڵ ئەنجامدەدرێن.

باسی لەوەشکرد، فڕۆکەخانەی سلێمانی گرنگییەکی زۆری لەڕووی گەشتیاری و بازرگانییەوە هەیە، و لە ئایندەیەکی نزیکدا گەشتی راستەوخۆ لە فڕۆكەخانەكەوە بۆ وڵاتانی ئەوروپا دەبێت.

ئەوەی پێویستە بیزانیت: داخستنی گەشتەکانی فڕۆکەخانەی سلێمانی بە ڕووی ئاسمانی تورکیا، یەکێک بوو لە لێکەوتەکانی شەڕی نێوان پەکەکە و تورکیا، بەڵام دوای دەستپێکردنی پرۆسەی ئاشتی و کۆبوونەوەی نێچیرڤان بارزانی، سەرۆکی هەرێمی کوردستان لەگەڵ ئەردۆغان، سەرۆك كۆماری توركیا، بڕیاردرا قەدەغەی گەشتەکانی تورکیا لەسەر فڕۆکەخانەی سلێمانی هەڵبگیرێت.