شاخەوان عەبدوڵڵا: بەردەوامین لە پووچەڵكردنەوەی هەوڵە شۆڤێنییەكان

ئاڤا نیوز

بڕیاری گواستنەوەی کارەبای چوار قەزا و ناحیەی کوردی بۆ سەر حەوێجە، نیگەرانی لێ دەکەوێتەوە، جێگری سەرۆکی پەرلەمانی عێراقیش دووپات لە بەردەوامی هەوڵەکانی دەکاتەوە بۆ هەڵوەشاندنەوەی بڕیارەکە.

چیرۆکی سەرەکی: لە مانگی ئابی ڕابردوو، بە بڕیارێک کارەبای هەردوو قەزای پردێ و داقووق و ناحیەکانی شوان و لەیلان لە پارێزگای کەرکووک، گوازرایەوە سەر بەڕێوەبەرایەتیی کارەبای حەوێجە و بە نووسراوێکی وەزارەتی کارەبا کە لە 28ـی مانگی ڕابردوو دەرچووە، بڕیارەکە چووەتە بواری جێبەجێکردن.

لێدوانی فەرمی: د. شاخەوان عەبدوڵڵا، جێگری سەرۆکی پەرلەمانی عێراق، لە کۆنفرانسێکی ڕۆژنامەوانیدا ڕایگەیاند، هەرگیز بەشێوەی تائیفی و نەتەوەیی بیرناکەینەوە بەڵام ئەمە ڕاستییەکی مێژوویی حاشاهەڵنەگرە کە خەڵکی ناوچە کوردستانییەکان، مێژووێکی تاڵمان لەگەڵ حەوێجە هەیە و ناکرێت هاونیشتمانیان بۆ داواکارییەکی ئاسایی کارەبا یاخود دانانی ستوونێکی کارەبا، بچنە حەوێجە و لەوێ مامەڵەکانیان بکەن.

ڕاشیگەیاند: هەر لەگەڵ دەرچوونی بڕیارەکە، ڕای گشتیم لێ ئاگادارکردەوە کە فێڵ لە پارێزگاری کەرکووک کراوە و ئەوکات داوام کرد پارێزگاری کەرکووک بە نووسراو داوای هەڵوەشاندنەوەی بڕیارەکە بکات، کەچی بەجێگەی ئەوە، دەیان میدیا و پەیجی بەکرێگیراو هێرشیان کردە سەر من و بەناڕاست لەقەڵەمیان دا؛ نووسراوی وەزارەتی کارەبا بە ژمارە 32058 لە 28-10-2025، کە بڕیاردراوە ئەو بابەتە بچێتە باری جێبەجێکردنەوە، دووپاتکەرەوەی زانیارییەکانی من بوو."  

شاخەوان عەبدوڵڵا دەشڵێت: ماوەی ساڵێکە سەرجەم هەوڵەکانی خەڵکانی شۆڤێنیمان پووچەڵ کردووەتەوە، هەر لە هەوڵەکان بۆ گۆڕینی دیمۆگرافیای ناوچە کوردستانییەکان و گواستنەوەی هەیکەلیەتی ئیداریی فەرمانگەکان، تا دەگاتە بەردەوامبوونی بەڕێوەبەری کشتوکاڵی کەرکووک لەسەر نوێکردنەوەی گرێبەستی کشتوکاڵیی ئەو زەوییانەی کێشەیان لەسەرە.