لەسەر ڕاسپاردەی مەسرور بارزانی پڕۆژەیەکی گەورەی ئاو لە کۆیە دەچێتە بواری جێبەجێکردنەوە

ئاڤا نیوز

دوای ڕەزامەندی سەرۆکوەزیران مەسرور بارزانی، لەسەر جێبەجێکردنی پڕۆژەیەکی گەورەی ئاو، بەمەبەستی چارەسەرکردنی کێشەی ئاوی قەزای کۆیە و گوندەکانی دەورووبەری، بڕیارە لەچەند ڕۆژی داهاتوو گرێبەست لەگەڵ کۆمپانیای جێبەجێکار بکرێت.

وێنە گەورەکە: یەکێک لە ستراتیژییەکانی کابینەی نۆیەمی حکومەتی هەرێمی کوردستان کۆتاییهێنان بوو بە کێشەی کەمئاوی لە سەرجەم ناوچەکان، لەو چوارچێوەیەشدا چەند پڕۆژەیەکی گەورەی ئاو لەچەند ناوچەیەک جێبەجێکراون و بڕیارە لە کۆیەش بکرێت.

لێدوانی فەرمی:  ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت، چاوەڕێی نووسراوی ئەنجامدانی پڕۆژەکەین، بە ئەگەری زۆرەوە لە ماوەی 10 ڕۆژی داهاتوودا گرێبەستی جێبەجێکردنی پڕۆژەیەکی گەورەی ئاو لە کۆیە دەکرێت.

ئەمەش بزانە: پڕۆژەکە بە 112 ملیار دینار جێبەجێ دەکرێت لە ماوەی 18 مانگدا تەواو دەبێت، ئاو لە زێی بچووک وەردەگیرێت، کە پێکهاتووە لە پڕۆژەی ئاو و هێڵی گواستنەوە و وێستگەی ناوەندی، پڕۆژەکەش بە تۆڕی ئاوی کۆیە دەبەسترێتەوە و کێشەی کەمئاوی  دانیشتووانی کۆیە و چەند گوندێکی دەورووبەری چارەسەر دەکات.