دادگای کارگێڕی بڕیارێکی بانکی ناوەندی سەبارەت بە فرۆشتنی موڵک هەڵدەوەشێنێتەوە

ئاڤا نیوز

دادگای کارگێڕی بڕیارێکی بانکی ناوەندی عێراقی هەڵوەشاندەوە، کە هاووڵاتییانی ناچار دەکرد نرخی فرۆشتنی موڵکی سەرووی 100 ملیۆن دینار لە بانک دابنێن.

چیرۆکی سەرەکی: لە مانگی کانوونی یەکەمی 2023، بانکی ناوەندی عێراق بڕیارێکی دەرکرد کە هاووڵاتییانی ناچار دەکرد نرخی فرۆشتنی موڵکی سەرووی 100 ملیۆن دینار عێراقی لە ڕێگەی بانکەکانەوە ئەنجام بدەن، بە ئامانجی ڕێکخستنی مامەڵە داراییەکان و سنووردارکردنی بەکارهێنانی کاش لە بازاڕدا.

نووسراوی فەرمی: بەگوێرەی نووسراوێکی فەرمی، کە واژۆی د. عوسمان سەلمان عەبودی، سەرۆکی دادگای کارگێڕی لەسەرە، لە 2025-10-29 دەرچووە، جەخت لەوە دەکاتەوە کە پارێزگاری بانکی ناوەندی دەسەڵاتی دەرکردنی ڕێنمایی نییە بۆ سنووردارکردنی فرۆشتنی موڵک، بەڵکو ئەمە لە دەسەڵاتی ئەنجوومەنی وەزیراندایە.

هۆکارە زانراوەکان: بەگوێرەی دادگاكە بڕیارەکەی بانکی ناوەندی "ناڕەوا بوو بەرامبەر بەو کەسانەی کە کاری کڕین و فرۆشتنی خانووبەرە دەکەن، بووە هۆی پاشەکشەیەکی گەورە لە کڕین و فرۆشتنی موڵکدا.

کاریگەریی و لێکەوتەکان: بەگوێرەی نووسراوەکە ئەم بڕیارەی دادگای کارگێڕی دەبێتە هۆی بووژانەوەی بازاڕی کڕین و فرۆشتنی موڵک لە عێراقدا و یارمەتیدەر دەبێت بۆ کەمکردنەوەی گەندەڵی و دەستکاریکردنی نرخەکان.

ئەوەی پێویستە بیزانیت: بڕیارەکەی بانکی ناوەندی لە مانگی کانوونی یەکەمی 2023، وەک بەشێک بوو لە هەوڵەکانی حکومەت بۆ کۆنترۆڵکردنی سپیکردنەوەی پارە و پاڵپشتیکردن لە گۆڕانکاریی دیجیتاڵی لە کەرتی داراییدا.