لە بەغدا لەناو بارەگەیەکی حەشدی شەعبی تەقینەوە ڕوویدا؛ گیان لەدەستدان هەیە

ئاڤا نیوز

 

ئێوارەی ئەمڕۆ لەناو بارەگەیەکی حەشدی شەعبی لە باشووری ڕۆژهەڵاتی بەغدا تەقینەوەیەک ڕووی دا و لە ئەنجامدا سێ ئەندامی حەشد گیانیان لەدەستدا، هۆکاری تەقینەوەکەش بۆ پاشماوەی ئەو تەقەمەنییە سەربازییانە دەگەڕێتەوە کە لەکاتی هێرشەکانی دژی داعش دەستیان بەسەردا گیراوە.

 

وێنە گەورەکە: سەر لە ئێوارەی ئەمڕۆ سێشەممە دەستەی حەشدی شەعبی گیانلەدەستدانی ئەندامێک و برینداربوونی دوو ئەندامی هێزەکانیانی  لەکاتی ئەنجامدانی ئەرکێکی تەکنیکی لە ناوچەی جەرف نەداف ڕاگەیاند، ئاماژەی بەوەشدابوو، ڕووداوەکە کۆنتڕۆڵ کراوە و ڕێوشوێنی پێویست گیراوەتەبەر.

 

ڕاگەیێنراوی فەرمی: دەستەی حەشدی شەعبی ئەمشەو ڕاگەیێنراوێکی دیکەی لەسەر ئەم ڕووداوە بڵاو کردەوە و ئەوەشی خستووەتەڕوو، سێ ئەندامی هێزەکانیان لە ناوچەی جەرف نەدافی بەغدا لە ئەنجامی تەقینەوەی پاشماوەی سەربازیی کۆکراوە لە هێرشەکانی دژی داعش، گیانیان لەدەستداوە و سبەینێ لە ڕێوڕەسمێکی فەرمیدا بەخاک دەسپێردرێن.

 

میدیای عێراقیش دەڵێت، تەقینەوەکە لەکاتی کاری تیمەکانی بەشی تەقەمەنی ڕوویداوە کە هەوڵیانداوە پاشماوەی تەقەمەنییەکان پووچەڵ بکەنەوە، لە ئەنجامیشدا تەقینەوەکە ڕوویداوە و بەهۆیەوە جگە لە گیان لەدەستدانی سێ کەس، حەوت ماڵی نزیک لەو بارەگایەش زیانیان بەرکەوتووە.