پڕۆژەی فریاگوزاریی خێرای ئاوی هەولێر تەواو دەکرێت

ئاڤا میدیا

قۆناغی دووەمی پڕۆژەی فریاگوزاریی خێرای ئاوی هەولێر تەواوبوو و بەهۆیەوە 50 گەڕەکی دیکەی شاری هەولێر کێشەی کەمئاوییان چارەسەر دەبێت.

وێنە گەورەکە: پڕۆژەی فریاگوزاریی خێرای ئاوی هەولێر یەکێکە لە پرۆژە ستراتیژییەکانی کابینەی نۆیەم، لە مانگی تەممووزی ڕابردوو قۆناغی یەکەمی پرۆژەکە تەواوبوو، ئێستا قۆناغی دووەم تەواو بوو کە کێشەی کەمئاویی هەولێر تا 30ساڵی دیکە چارەسەر دەکات.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای ڕاگەیاند، قۆناغی دووەمی پڕۆژەی فریاگوزاریی خێرای ئاوی هەولێر لە تەواوبووندایە و تیمەکان ئێستا سەرقاڵی تێستکردنی هەر سێ هێڵی سەرەکیی گواستنەوەی ئاون، بۆئەوەی بتوانن وەک یەک بە هاوسەنگی ئاو بۆ ناو شار بگوازنەوە. جگە لەو هێڵەی لە قۆناغی یەکەم ئاو دەگوازێتەوە، لە چەند ڕۆژی داهاتووش سێ هێڵی دیکەی سەرەکی ئاوی خاوێن دەگەیێننە نزیکەی 50 گەڕەکی نێوان شەقامی 120 مەتری و شەقامی 150 مەتریی شاری هەولێر.

ئەوەی پێویستە بیزانیت: بە تەواوبوونی پڕۆژەی فریاگوزاریی خێرای ئاوی هەولێر کێشەی کەم ئاوی تا 30 ساڵی داهاتوو لە شاری هەولێر چارەسەر دەبێت.

زانیاریی زیاتر: پڕۆژەی فریاگوزاریی خێرای ئاوی هەولێر، لە ڕۆژێكدا 480 هەزار مەتر سێجا ئاو دەپاڵێوێت، بۆ هەر کاتژمێرێک 20 هەزار مەترسێجا ئاوی خاوێن بۆ گەڕەكەكانی شاری هەولێر دەنێرێت و دەبێتە هۆی داخستنی زیاتر لە هەزار بیری ئاو،  250 بۆ 300 هەزار هاوبەش لێی سوودمەند دەبن.