ڕێبوار هادی: لە خولی نوێی پەرلەمان کار لەسەر هەمواری یاسای هەڵبژاردن دەکەین

ئاڤا نیوز

سەرۆکی لیستی پارتی لە هەولێر دووپاتی دەکاتەوە ئەگەر هەڵبژاردن لە عێراق یەک بازنەیی بێت، ئەوا کورسییەکانی کورد لە 100 کورسی نزیک دەبێتەوە، بۆیە لەسەر فەرمانی سەرۆک بارزانی کار لەسەر هەمواری یاسای هەڵبژاردنی پەرلەمانی عێراق دەکەین.

وێنە گەورەکە: ڕۆژی 11ـی ئەم مانگە، هەڵبژاردنی پەرلەمانی عێراق دەکرێت، بۆ ئەم خولەی هەڵبژاردن، عێراق کراوەتە 18 بازنە، هەر پارێزگایەک ژمارەی کورسییەکانی دیارکراوە، ڕێژەی بەشداری هەرچەند بێت کاریگەری لەسەر ژمارەی کورسییەکان نابێت، ئەمەش کاریگەری لەسەر ژمارەی کورسییەکانی کورد لە پەرلەمانی عێراق دەبێت.

لێدوانی فەرمی: د. ڕێبوار هادی، سەرۆکی لیستی پارتی لە هەولێر و بەربژێری ژمارە یەکی لیستی 275ـی پارتی لە بازنەی هەولێر، بە ئاڤای گوت: ئەگەر هەڵبژاردن لە عێراق یەک بازنە بێت، کورسی کورد لە پەرلەمانی عێراق لە 100 کورسی نزیک دەبێتەوە، چونکە ڕێژەی بەشداری لە هەڵبژاردن هەرێمی کوردستان زۆر زیاترە بەراورد بە ناوچەکانی دیکەی عێراق، بۆیە لە سەر فەرمانی سەرۆک بارزانی، لە خولی داهاتوو کار لەسەر هەمواری یاسای هەڵبژاردن دەکەینەوە.

زانیاریی زیاتر: ڕێبوار هادی گوتیشی، زۆربەی ئەو یاسایانەی نەتوانرابوو لە خولەکانی دیکەی پەرلەمای عێراق تێبەپەڕینین، لە خولی پێنجەم تێمانپەڕاندن، نەمانهێشت هەندێک یاساش دەربکرێن کە دژی هەرێمی کوردستان بوون.

لە خولی شەشەمی پەرلەمان کار لەسەر دەرچوواندنی یاسای ئەنجوومەنی فیدراڵی دەکەین بەوجۆرەی کە لە دەستوور هاتووە، کار لەسەر ئەوەش دەکەین دەستوور وەک خۆی جێبەجێ بکرێت، ئەو مادانەشی پێویستیان بە یاسا بێت، یاسای بۆ دەربچوێنرێت.