تورکیا یاسایەک بۆ گەڕاندنەوەی هەزاران چەکداری پەکەکە ئامادە دەکات

ئاڤا نیوز

هەوڵەکان بۆ هێنانەکایەی ئاشتی لە تورکیا زیاتر بوون و حکومەتی تورکیا دەیەوێت بە یاسایەکی لێخۆشبوون بۆ چەکدارانی پەکەکە دەربکات.

زانیاریی بەدەستهاتوو: بەرپرسێکی باڵای ڕۆژهەڵاتی ناوەڕاست و سەرچاوەیەکی سیاسی کورد لە تورکیا بە ئاژانسی ڕۆیتەرزییان ڕاگەیاندووە، یاسا پێشنیازکراوەکە پارێزگاری لەو چەکدارانە دەکات کە دەیانەوێت بگەڕێنەوە بۆ ماڵەکانیان لە باکووری کوردستان و تورکیا، " بەڵام ئەو چەکدارانەی کە تاوانیان ئەنجامداوە لێبووردنی گشتیی نایانگرێتەوە و هەندێک لە سەرکردە و چەکدارەکانی پەکەکە لەوانەیە بنێردرێنە وڵاتانی دیکە".

زانیاریی زیاتر: بەرپرسە باڵاکەی ڕۆژهەڵاتی ناوەڕاست ڕایگەیاند، دەکرێت هەر لەم مانگەدا یاساکە ببرێتە بەردەم پەرلەمانی تورکیا و ڕێگە بە گەڕانەوەی چەکدارانی پەکەکە بدرێت.

گەڕاندنەوەی چەکدارانی پەکەکە و خێزانەکانیان لە بنکەکانیان لە هەرێمی کوردستان بە یەکێک لە دوا ئاستەنگەکانی پڕۆسەی ئاشتی دادەنرێت کە ساڵێک لەمەوبەر دەستیپێکرد بۆ کۆتاییهێنان بەو جەنگەی کە زیاتر لە 40 هەزار کەس تێیدا کوژراوە.

باکگراوند: لە 12ـی مانگی پێنجی ئەمساڵدا، پارتی کرێکارانی کوردستان 'پەکەکە' لە کۆنگرەیەکدا هەڵوەشاندنەوەی پەیکەربەندی ڕێکخستنی خۆی ڕاگەیاند، کۆتایی بە خەباتی چەکداری و هەموو ئەو چالاکییانەی بەناوی پەکەکەوە دەکران هێنا.