ئێران پلان بۆ کوشتنی باڵیۆزێکی ئیسرائیل دادەڕێژێت

ئاڤا نیوز

ئێران هەوڵیداوە یەکێک لە باڵیۆزەکانی ئیسرائیل لە وڵاتی مەکسیک تیرۆر بکات، بەڵام هەوڵەکە لەلایەن دەزگا ئەمنییەکانی ئەو وڵاتە شکستی پێهێنراوە.

چیرۆکی سەرەکی: لە کۆتایی ساڵی 2024 بریکارێکی ئێران بە ناوی حەسەن ئیزادی کە کاری بۆ یەکەی 11 هەزاری سەر بە فەیلەقی قودسی سوپای پاسدارانی ئێران کردووە هەوڵی کوشتنی ئینات کرانز باڵیۆزی ئیسرائیل لە مەکسیک داوە.

زانیاریی بەدەستهاتوو: دوو بەرپرسی ئەمریکی و ئیسرائیلی بە کەناڵ 12ـی ئیسرائیلیان ڕاگەیاندووە، هەوڵدان بۆ کوشتنی باڵیۆزەکەی ئیسرائیل دەرخەری ئەوەیە ئێران تۆڕێکی تیرۆری فراوان لە ئەمریکای لاتین بەڕێوەدەبات بۆ بە ئامانجگرتنی ئیسرائیل و ئەمریکا.

لێدوانی فەرمی: وتەبێژێک لە وەزارەتی دەرەوەی ئیسرائیل ڕایگەیاند، وڵاتەکەمان لە بەرامبەر شکستپێهێنانی کاری ئەو تۆڕە تیرۆرییە کە بە فەرمانی ئێران ویستوویانە زیان بە باڵیۆزی ئیسرائیل بگەیەنن، سوپاسی دەزگا ئەمنییەکانی مەکسیک دەکات.

زانیاریی زیاتر: بەپێی زانیاری دەزگا هەواڵگرییەکانی ئەمریکا بەشێکی زۆری چالاکییەکانی ئێران لە ئەمریکای لاتین لەلایەن باڵیۆزخانەی ئێران لە ڤەنزوێلاوە بەڕێوەدەبرێت.