سەرۆکی پەرلەمانی تورکیا: پەکەکە بەبێ مەرج بڕیاری خۆهەڵوەشاندنەوەی داوە

ئاڤا نیوز

 

سەرۆکی پەرلەمانی تورکیا جەخت لەوە دەکاتەوە پەکەکە بەبێ هیچ جۆرە مەرجێکی وەک داواکردنی فیدڕاڵی و بە فەرمیکردنی زمانی کوردی بڕیاری خۆهەڵوەشاندنەوە و چەکدانانی داوە  و، ڕەتیشی دەکاتەوە "ئەگەری پێدانی مافی هیوا بە ئۆجەلان و ئازادکردنی بە مەرج لە ئارادا بێت".

 

وێنە گەورەکە: دوای بڕیاری پەکەکە بۆ کشاندنەوەی هێزەکانی لە تورکیا و باکووری کوردستان لە 26-10-2025، گەڕێکی دیکەی گفتوگۆکانی پەیوەندیدار بە پرۆسەی ئاشتی دەستی پێ کردووە. شاندی ئیمڕاڵیی دەم پارتی لەگەڵ ئەردۆغان و ئۆجەلان کۆبووەتەوە و بڕیاریشە لە چەند ڕۆژی داهاتوودا کۆبوونەوەی فراکسیۆنە پەرلەمانییەکەی تورکیا بە بەشداریی وەزیرانی ناوخۆ و بەرگری و سەرۆکی هەواڵگریی تورکیا بەڕێوە بچێت.

 

لێدوانی فەرمی: نوعمان کورتوڵموش، سەرۆکی پەرلەمانی تورکیا بە میدیاکارانی تورکیای گوت "تاوەکوو دامەزراوە پەیوەندیدارەکانی تورکیا بۆیان دەرنەکەوێت پەکەکە بە تەواوی چەکی داناوە، ئەوان لە پەرلەمان زەمینەی یاسایی بۆ پرۆسەکە ناڕەخسێنن و، جەختیش لەوە دەکاتەوە ئەمە پرۆسەی چەکدانان و خۆهەڵوەشاندنەوەی پەکەکەیە، "نەک سەودا و مامەڵە بێت لە نێوان تورکیا و پەکەکەدا".

 

بەتەنیشت ئەم بابەتەوە: کورتوڵموش ڕەتی دەکاتەوە بە هیچ جۆرێک "بچووکترین سازشیش لەسەر ناسنامەی تورکێتیی تورکیا" بکەن بۆ ئەم پرۆسەیە و دەڵێت: بە هیچ جۆرێک سادەترین گفتوگۆش لەسەر ئەوە نەکراوە و لە داهاتووشدا ناکرێت کە جگە لە تورکی زمانێکی دیکەش بکرێتە زمانی فەرمی، پێکهاتەی ناوەندگەرایی تورکیا بگۆڕرێت و سیستەمی حوکمڕانی تورکیا بگۆڕێت بۆ فیدڕاڵی و چوار ماددە نەگۆڕەکەی دەستووری تورکیا هەموار بکرێنەوە.

 

پێویستە ئەمەش بزانیت: سەرۆکی پەرلەمانی تورکیا جەختی لەوەش کردەوە کە بەکارهێنانی زمانی دایک وەک شیری دایک حەڵاڵە و لە سەردەمی حوکمڕانی تورگوت ئۆزالەوە قەدەغەکارییەکانی سەر گۆرانیی کوردی هەڵگیراون و لە قۆناغی پێشووی پرۆسەی ئاشتیشەوە، دەرگای زیاتر بە ڕووی زمانی کوردیدا واڵا کراون.