حکومەتی هەرێمی کوردستان درۆنی ئاگرکوژێنەوە بۆ بەرگریی شارستانی دابین دەکات

ئاڤا نیوز


لە چوارچێوەی جێبەجێکردنی پڕۆژەی ڕێبەری سەلامەتی، حکومەتی هەرێمی کوردستان درۆنی ئاگرکوژێنەوە بۆ بەڕێوەبەرایەتییەکانی بەرگریی شارستانی دابین دەکات، بڕیاریشە لەماوەی چەند ڕۆژی داهاتوودا بەردەست بن.

وێنە گەورەکە: وەزارەتی ناوخۆی حکومەتی هەرێمی کوردستان ماوەی چەند ساڵێکە کاری لەسەر ڕێبەری سەلامەتی کردووە و ئەمساڵ بە ئامادەبوونی سەرۆکوەزیرانی مەسرور بارزانی،  حەوت بەرگی ڕێبەری سەلامەتی بڵاوکرایەوە و دەبێتە بنەمایەک بۆ سیستمی ئاگرکوژێنەوە.

لێدوانی فەرمی: هێمن میرانی، بەڕێوەبەری گشتیی دیوانی وەزارەتی ناوخۆ دەڵێت، وەزارەتی ناوخۆ لە ئایندەیەکی نزیک درۆنی گەورە بۆ کوژاندنەوەی ئاگر لە باڵەخانەی بەرز دەخاتە بەردەست تیمەکانی بەرگری شارستانی، کە ئەم مانگە لە ڕاهێنانێکی نزیکی یەک مانگە گەڕانەوە و بوونە خاوەن بڕوانامەی نێودەوڵەتیی بەکارهێنانی درۆن بۆ ئاگرکوژاندنەوە .

گوتیشی،  لە کۆی سێ تاوەری 100 مەتری کە بۆ ڕزگارکردن و ئاگرکووژاندنەوە بە گوژمەی سێ ملیۆن و 750 هەزار یۆرۆ لەسەر داهاتی ناوخۆ کڕدراون، دووانیان بۆ بەڕێوەبەرایەتیی بەرگریی شارستانی هەولێر و سلێمانی دابین کراون، لەچەند ڕۆژی داهاتووشدا بۆ دهۆک دەنێردرێت.