دوو منداڵی خێزانێکی گەشتیار لە مەلەوانگەی باخێکی شەقڵاوە خنکان

ئاڤا نیوز

خوشک و برایەک کە تەمەنیان هەشت ساڵ و نۆ ساڵ بووە، لە مەلەوانگەی ڤێلایەکی گەشتیاریی لە سنووری شەقڵاوە، ویستوویانە مەلە بکەن، بەڵام هەردووکیان خنکاون و ڕەوانەی پزیشکی دادی هەولێر کراون.

زانیاری بەدەستهاتوو: لەم چەند ڕۆژە خێزانێکی دانیشتووی حللە لە سنووری پارێزگای بابل، بۆ گەشت هاتوونەتە سنووری قەزای شەقڵاوە، ڤێلایەکیان بە کرێ گرتووە، بەڵام دوو منداڵیان کە یەکێکیان کوڕە و ئەوەی دیکەیان کچە خنکاون و بڕیارە تەرمەکانیان ڕەوانەی زێدی خۆیان بکرێتەوە.

لێدوانی فەرمی: عەقید عەبدولقادر دڵشاد، بەڕێوەبەری بەرگریی شارستانی شەقڵاوە بە ئاڤای ڕاگەیاند، "ئەریح عەباس ئەحمەد، تەمەن هەشت ساڵان، ئەحمەد عەباس ئەحمەدی نۆ ساڵان، بەبێ ئاگاداری دایک و باوکیان لە مەلەوانگەی ڤێلاکە مەلەیان کردووە و خنکاون، ئێستا تەرمەکانیان ڕەوانەی پزیشکی دادی هەولێر کراون."

بەوتەی عەقید عەبدولقادر، دوای تەواو کردنی ڕێکارەکان، تەرمی دوو منداڵەکە ڕادەستی خانەوادەکەیان دەکرێتەوە و دەبرێنەوە زێدی خۆیان.