ڕوانگەی سووری: 249 خێزانی عێراقی مانگی ڕابردوو کەمپی هۆلیان جێهێشتووە

ئاڤا نیوز

ڕوانگەی سووری بۆ مافەکانی ڕایدەگەیێنێت، 292 خێزانی عێراقی و سووری کەمپی هۆلیان جێهێشتووە، جەختیش لەوە دەکاتەوە کۆی ژمارەی ئەو عێراقییانەی گەڕاونەتەوە نزیکەی 840 کەس بووە لە ماوەی مانگی تشرینی یەکەمی ڕابردوودا.

وێنە گەورەکە: کەمپی هۆل، گەورەترین کەمپی ژن و منداڵی خێزانەکانی داعشە لە ڕۆژئاوای کوردستان، بەگوێرەی نوێترین ئامارەکان، ئێستا زیاتر لە 30 هەزار کەسی تێدا ماوە، تا ئێستاش عێراق توانیویەتی نزیکەی 19 هەزار هاووڵاتی خۆی بگەڕێنێتەوە وڵاتەکە.

ئەوەی پێویستە بیزانیت: بەگوێرەی نوێترین ئامارەکانی وەزارەتی کۆچ و کۆچبەرانی عێراق، تا ئێستا 19 هەزار کەسیان لە کەمپی هۆلی سووریا گەڕاندووەتەوە، کە پیاوان و ژنان و بەساڵاچووان و گەنجان و منداڵانی تێدایە.

بڵاوکراوەی فەرمی: بەگوێرەی ڕاپۆرتی روانگە سووری، ئیدارەی خۆسەر لە باکوور و ڕۆژهەڵاتی سووریا بەردەوامە لە جێبەجێکردنی پرۆگرامی گەڕانەوەی خۆبەخشانە بۆ ئاوارە و پەنابەرانی نیشتەجێ لە کەمپەکانی ناوچەکە، بە هەماهەنگی لەگەڵ کۆمیسیۆنی باڵای نەتەوەیەکگرتووەکان بۆ کاروباری پەنابەران و لایەنە نێودەوڵەتییەکان.

شێوازی جێىەجێکردن: ڕوانگە ڕوونیکردەوە کە جێبەجێکردنی ئەم پرۆگرامە "هاوکاتە لەگەڵ ڕادەستکردنی ژمارەیەکی نوێی خێزانەکانی چەکدارانی ڕێکخراوی داعش بە وڵاتەکانیان"، ئەوەش لە چوارچێوەی هەوڵەکان بۆ کەمکردنەوەی قەرەباڵغی و باشترکردنی دۆخی مرۆیی لە کەمپەکاندا.

ژمارەکان وا دەڵێن: لە 27ی تشرینی یەکەم، 249 خێزانی عێراقی (نزیکەی 840 کەس) کەمپی هۆلیان بەرەو کەمپی جەدعە لە نەینەوا بەجێهێشت، بە هەماهەنگی لەگەڵ ئەنجوومەنی نوێنەرانی عێراق و لیژنەی کۆچ و کۆچبەران و بە پاراستنی هێزەکانی هاوپەیمانی نێودەوڵەتی.

•    43 خێزانی سووری، کە 188 کەسیان تێدابوو، بەرەو حەلەب، لازقییە، تەدمور و دەرعا ڕۆیشتوون.

•    5 ژن و 12 منداڵ لە خێزانەکانی "داعش" لە ڕێگەی شاندێکی فەرمییەوە ڕادەستی باشووری ئەفریقا کراون.

•    لە 15ی تشرینی یەکەم، قۆناغی سێیەمی ئاوارەکانی کەمپی مەحموودلی (12 پاس و 24 بارهەڵگر کە 28 خێزان و 133 کەسیان تێدابوو) بەرەو شار و گوندەکانیان لە پارێزگاکانی سووریا گەڕانەوە.

•    لە 26ی تشرینی یەکەم، 15 خێزان (55 کەس) لە کەمپی هۆلەوە بەرەو حەلەب گەڕانەوە.