کۆمەڵی دادگەری: لەبارەی بەشداریکردن لە پەرلەمان و حکومەت خۆمان یەکلا نەکردووەتەوە

ئاڤا نیوز

کۆمەڵی دادگەریی كوردستان كە لە لەماوەی ڕابردوودا بڕیاری دا بەشداریی لە پەرلەمانی كوردستان نەكات، بەڵام ئێستا لەنێو سەركردایەتیی حیزبەكەدا بۆچوونی بەرامبەر دروست بووە و داوا دەكرێت لە پەرلەمان و حكومەت بەشدار بن، سەركردەیەكی حیزبەكەش ئاماژە بە ئەوە دەكات كە هێشتا یەكلا نەبوونەتەوە.

وێنە گەورەکە: هەوڵەکانی پێکهێنانی کابینەی دەیەمی حکومەتی کوردستان بەردەوامن، پارتی وەک براوەی یەکەمی هەڵبژاردن لەگەڵ یەکێتی چەندین کۆبوونەوە و گفتوگۆی کردووە، ئێستاش لایەنەکانی دیکە دەیانەوێت بەشدار بن.

لێدوانی فەرمی: شوان ڕابەر، ئەندامی ئەنجوومەنی باڵای کۆمەڵی دادگەریی کوردستان بە ئاڤای ڕاگەیاند: "تاوەكوو ئێستا دیار نییە كە بەشداری لە پەرلەمانی کوردستان دەكەین یان نا، ئەگەر بەشداری لە پەرلەمان نەكەین بێگومان بەشداری لە حكومەتیشدا ناكەین."

باکگراوند: لە هەڵبژاردنی خولی شەشەمی پەرلەمانی کوردستان، کۆمەڵی دادگەری لە چوار بازنە 64 هەزار و 710 دەنگی هێناوە و سێ کورسی بەدەستهێنا، کورسییەک لە هەولێر و دوو لە سلێمانی.

ئەمەش بزانە: ڕۆژی 26-10-2024، سەرکردایەتیی کۆمەڵی دادگەری بڕیاری دا بەشداری لە خولی شەشەمی پەرلەمانی کوردستان نەکات، بەڵام دوای ئەوە هێرۆ عەتار، کاندیدی دەرچوو لە بازنەی سلێمانی بایکۆتی شکاند و بوو بە پەرلەمانتار، ئێستا تەنیا دوو کاندیدی ماوە کە سوێندی یاسایی بخۆن.