کوردێک لە پاڵەوانیەتییەکی لەشجوانیی جیهانی دوو نازناو بەدەستدەهێنێت

ئاڤا نیوز

کوردێکی پاڵەوانی لەشجوانی، بەشداری پاڵەوانیەتییەکی نێودەوڵەتی لەشجوانی کردووە و توانیویەتی دوو نازناو بەدەست بهێنێت.

چیرۆکی سەرەکی: ڕێژەن فوئاد، کوردێکی خەڵکی سلێمانییە و دانیشتووی وڵاتی فینلەندایە، پاڵەوانی لەشجوانییە، 18 ساڵە وەرزشی لەشجوانی دەکات، لەسەر ئاستی هەرێمی کوردستان، عێراق، ئاسیا و جیهان بەشداری لە 12 پاڵەوانیەتی کردووە، دوو لەو پاڵەوانیەتییانە لەسەر ئاستی جیهان بوونە.

ڕێژەن سێ ڕۆژ لەمەوبەر لە وڵاتی دانیمارک، بەشداری لە پاڵەوانیەتییەکی نێودەوڵەتی کردووە، پاڵەوانیەتیەکە لە ئاستی (NPC PRO QUAlIFIER)  بووە، 120 یاریزان لە 20 وڵات بەشدارییان تێدا کردبوو، پاڵەوانە کوردەکە لە کێشی 80 کیلۆگرام، دوو نازناوی بەدەستهێناوە، لە بۆدی بێڵدینگ پلەی یەکەم و لە کلاسیک فیزیک پلەی دووەمی بەدەستهێناوە.

لێدوانی فەرمی: ڕێژەن فوئاد، بە ئاڤای گوت: ئەو پاڵەوانیەتییەی بەشداریم تێدا کردووە و دوو نازناوم بەدەستهێناوە، هەنگاوێکە بۆ گەیشتن بە میستەر ئۆلۆمپیا، (میستەر ئۆلۆمپیا بەناوبانگترین پێشبڕکێی لەشجوانییە لەسەر ئاستی جیهان)، تەنیا دوو هەنگاوم ماوە، ئەویش دوو پاڵەوانیەتی دیکەیە دەبێت بەشداریی تێدا بکەم، بۆ ئەمەش هەموو هەوڵێکم دەدەم و بە بەرنامەیەکی زانستی ورد و بە پلانێکی تەواو زۆر بەباشی مەشقەکانم ئەنجام دەدەم بۆ ئەوەی خەونی گەیشتن بە میستەر ئۆلۆمپیا بکەمە ڕاستی و وەک کوردێک بەشداری لەو پاڵەوانیەتییە جیهانییە بکەم.