کۆمیسیۆن بۆ ئاڤا: تا سەرەتای مانگی داهاتوو وەڵامی تانەکان دەدەینەوە

ئاڤا نیوز

وتەبێژی کۆمیسیۆنی هەڵبژاردنەکانی عێراق ڕایگەیاند، بۆ وەڵامدانەوەی ئەو 872 تانەیەی لەسەر ئەنجامەکانی هەڵبژاردن تۆمارکراون، حەوت ڕۆژی کارکردنیان لەبەردەمە بەوپێیەش تا سەرەتای مانگی داهاتوو وەڵامی تانەکان دەدەنەوە و ئاڕاستەی دەستەی دادوەری هەڵبژاردنەکانی دەکەن.

چیرۆکی سەرەکی: ڕۆژی سێشەممە 11-11-2025، پرۆسەی هەڵبژاردنی خولی شەشەمی پەرلەمانی عێراق بەڕێوەچوو، سەرووی 12 ملیۆن دەنگدەر لە سەرتاسەری عێراق بەشداریان لە پرۆسەکەدا کرد.

لێدوانی فەرمی: جومانە غەڵای، وتەبێژی کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، ئەو ماوەیەی لەبەردەم کۆمیسیۆنە بۆ وەڵامدانەوەی تانەکانی هەڵبژاردن حەوت ڕۆژی کارکردنە.

ئەو مانایە دەگەیێنێت: ئەگەر ماوەکەی کۆمیسیۆن لە ئەمڕۆ یەکشەممەوە دەستپێبکات، پێنج ڕۆژی کارکردنی ئەم هەفتەیە و ڕۆژانی یەکشەممە و دووشەممەی داهاتوو دەکات، بەوپێیەش ڕۆژی سێشەممەی داهاتوو (2ی 12ی 2025) پێویستە وەڵامەکانی کۆمیسیۆن گەیشتبێتە دەستەی دادوەری هەڵبژاردنەکان، دەستەکەش 10 ڕۆژی لەبەردەمە بۆ یەکلاییکردنەوەی تانەکان، واتە 17ـی مانگی داهاتوو پێویستە دەستەی دادوەری هەڵبژاردنەکان وەڵامی تانەکانی دابێتەوە و کۆمیسیۆنیش ئەنجامی کۆتایی هەڵبژاردن بۆ دادگای فیدڕاڵی دەنێرێت.