وتەبێژی پارتی: پۆستی سەرۆککۆمار پشکی کوردە و مەرج نییە بۆ یەکێتی بێت

ئاڤا نیوز

پارتی دیموکراتی کوردستان لە هەوڵەکانی بۆ پێکهێنانی کابینەی دەیەمی حکومەتی هەرێمی کوردستان بەردەوامە و وتەبێژی حیزبەکەش ئاشکرای دەکات، دەرگای گفتوگۆیان بەڕووی هیچ لایەنێک دانەخستووە بەڵام بەگوێرەی بارودۆخی ئێستا ڕێککەوتن دەکەن. 

چیرۆکی سەرەکی: ڕۆژی یەکشەممە 23-11-2025, وتەبێژی پارتی دیموکراتی لە لێدوانێکی تایبەتدا بۆ ئاڤا هەڵوێستی حیزبەکەی بۆ پێکهێنانی کابینەی دەیەمی حکومەتی هەرێمی کوردستان و پێکهێنانی حکومەتی عێراق ئاشکرا کرد.

لێدوانی فەرمی: مەحموود محەممەد، وتەبێژی پارتی دیموکراتی کوردستان ڕایگەیاند: ماوەی ساڵێک زیاتر بەسەر هەڵبژاردنی پەرلەمانی کوردستان تێپەڕیوە، بەر لە هەڵبژاردنی عێراق لەگەڵ یەکێتی لە زۆر بواردا ڕێککەوتبووین، داواشمان کرد کە بابەتی عێراق تێکەڵ بە هەرێمی کوردستان نەکرێت چونکە دوو پرسی جیاوازە. 

گفتوگۆکان بۆ پێکهێنانی کابینەی دەیەم:

- ئێستا لە پێکهێنانی کابینەی نوێدا دەبێت ڕەچاوی ئەوە بکرێت، خەڵکی هەرێمی کوردستان چەند متمانەی بەو هێزانە داوە بەشی ئەوەش بەرپرسیارییەتیان پێبدرێت.

- لەگەڵ جوڵانەوەی نەوەی نوێ گفتوگۆمان کردووە بۆ پێکهێنانی حکومەت بەڵام داواکارییان هەبوو نەدەکرا جێبەجێ  بکرێت، ئێستا چاوەڕێ هەڵوێستی نوێ و گۆڕانکاری ئەو حیزبەین. 

- پارتی دیموکراتی کوردستان دەیەوێت پەرلەمان و حکومەت کارا بکرێت، هەر لایەنێک ئامادەبێت بۆ ئەو پرۆسەیە گفتوگۆی لەگەڵ دەکەین.

هەڵوێستی پارتی لەبارەی پێکهێنانی حکومەتی نوێ عێراق:

- پۆستی سەرۆککۆمار بۆ کوردە و مەرج نییە بۆ یەکێتی نیشتمانی کوردستان بێت، لەوبارەوە گفتوگۆ دەکەین و ڕێککەوتن لەبارەیەوە پێویستە. 

- مەرجی پارتی بۆ پێکهێنانی حکومەتی عێراق ئەوەیە، دەبێت ئەو لایەنانەی پێکهێنەری سەرەکین باوەڕیان بە دەستوور و  جێبەجێکردنی بنەماکانی هاوبەشی هەبێت, بەبێ جیاوازی حکومەت لە خزمەت هەموو چین و توێژەکاندا بێت.