وادەی کۆتایی بۆ مامەڵەی حاجییان دیاری دەکرێت

ئاڤا نیوز

بەڕێوەبەرایەتیی گشتیی حەج و عەمرەی هەرێمی کوردستان ڕایگەیاند، پێویستە ئەو کەسانەی ناویان لە تیروپشک بۆ حەجی ئەمساڵ دەرچووە تا ڕۆژی پێنجشەممە سەردانی نووسینگەکانی حەج و عەمرە بکەن بۆ کۆتایهێنان بۆ مامەڵەکانیان.

لێدوانی فەرمی: کاروان ستونی، وتەبێژی بەڕێوەبەرایەتیی گشتیی حەج و عەمرەی هەرێمی کوردستان بە ئاڤای ڕایگەیاند: ئەو کەسانەی ناویان لە تیروپشکی حاجیان دەرچووە، پێویستە تاوەکو ڕۆژی پێنجشەممە 27-11-2025 سەردانی نووسینگەکانی حەج و عەمرە بکەن و مامەڵەکانیان تەواو بکەن، هەر کەسێک لەو کاتەی دیاریکراوە دوابکەوێت، ئەوا خۆی بەرپرسیار دەبێت.

لەلایەکی دیکەوە: کاروان ستونی وتیشی: بەڕێوەبەرایەتیی گشتیی حەج و عەمرە لەگەڵ نووسینگەکانی حەج و عەمرە لە پارێزگا و ئیدارە سەربەخۆکان ڕۆژانی پشووش کار دەکەن، بۆ ئەوەی مامەڵەی حاجیان زوو تەواو بکرێت.

زانیاریی زیاتر: پێویستە هەر کەسێک پاسپۆرت و کۆپیەکی پاسپۆرت و کارتی نیشتمانی و کارتی زانیاری بەشێوەی ڕەنگاو ڕەنگ لە یەک کاتدا بهێنن، هەروەها بڕی حەوت ملیۆن و 100 هەزار دینار وەکو تێچووی حەج لەگەڵ خۆیان بهێنن.