ئۆکرانیا و ئەمریکا سەبارەت بە پلانی ئاشتی گەشبینن

ئاڤا نیوز

بۆ گەیشتن بە چارەسەری شەڕی نێوان ڕووسیا و ئۆکرانیا، دوێنێ ئەمریکا و ئۆکرانیا کۆبوونەوە، بەگوتەی بەرپرسانی هەردوولا، پێشکەوتنی بەرچاو بەدەستهاتووە.

چیڕۆکی سەرەکی: ڕۆژی یەکشەممە بەرپرسانی باڵای ئەمریکا و ئۆکرانیا و ڕاوێژکارانی ئاسایشی نەتەوەیی هەریەکە لە وڵاتانی فەرەنسا، بەریتانیا و ئەڵمانیا لە شاری جنێڤی سویسرا تاوتوێی ڕەشنووسی پلانی واشنتنیان بۆ کۆتاییهێنان بە شەڕی ئۆکرانیا کرد.

لێدوانی فەرمی: مارکۆ ڕوبیۆ، وەزیری دەرەوەی ئەمریکا ڕایگەیاند، کۆبوونەوەکە بەرهەمدارترین و گرنگترین کۆبوونەوە بووە لە سەرەتای دەستپێکردنی ئەم پرۆسەیەوە، پێداچوونەوەی تەواوی ڕەشنووسەکەمان کرد، ئێستا تیمەکانیان خەریکی ئەنجامدانی چەند گۆڕانکاری و دەستکارییەکن بۆ ئەوەی بۆچوونەکان زیاتر لەیەکتری نزیکببنەوە، لەبارەی ڕووسیاوەش وتی، ئەوانیش بەشێکن لە هاوکێشەکە، بەڵام بڕیاری کۆتایی سەرۆکی هەردوو وڵاتەکە دەیدەن.

بەتەنیشت ئەم بابەتەوە: ئەندری یەرماک، سەرۆکی دانوستانکاری ئۆکرانیا و بەڕێوەبەری نووسینگەی سەرۆکایەتی وڵاتەکە لەبارەی کۆبوونەوەکە وتی، پێشکەوتنی زۆر باشمان بەدەستهێناوە، بەرەو پێشەوە دەڕۆین بەرەو ئەو ئاشتییە دادپەروەر و بەردەوامەی کە گەلی ئۆکراینا شایەنییەتی.

ئەوەی پێویستە بیزانیت: دۆناڵد ترەمپ، سەرۆکی ئەمریکا، تا 27ـی ئەم مانگە مۆڵەتی بە ئۆکرانیا داوە بۆ ئەوەی بە پلانی ئاشتی ڕازی بێت.