ئاڤا ناوەڕۆکی کۆبوونەوەی سەرکردە سوننەکان ئاشكرا دەکات

ئاڤا نیوز

ئەندامێکی ئەنجوومەنی سیاسیی نیشتمانیی هێزە سووننەکان، دەرئەنجامی کۆبوونەوەی دوێنێی هێزە سوننەکانی لە ماڵی خەمیس خەنجەر، سەرۆکی هاوپەیمانی سیادە بۆ ئاڤا ئاشكرا کرد.

وێنە گەورەکە: ئێوارەی یەکشەممە، سەرکردەی لایەنە سوننییەکان کە پێکهاتبوون لە هەریەک لە محەممەد حەلبووسی، سەرۆکی حیزبی تەقەدووم. موسەننا سامەڕائی، سەرۆکی هاوپەیمانی عەزم. سابت عەباسی، سەرۆکی هاوپەیمانی حەسم و بەدر فەحل، پارێزگاری سەڵاحەددین، لە ماڵی خەمیس خەنجەر، سەرۆکی هاوپەیمانی سیادە کۆبوونەوە و هاوپەیمانێتیی "ئەنجوومەنی سیاسیی نیشتمانی"ـیان ڕاگەیاند.

لێدوانی فەرمی: بەدر فەحل، پارێزگاری سەڵاحەددین و ئەندامی ئەنجوومەنی سیاسیی نیشتمانی بە ئاڤای ڕاگەیاند: ئەنجوومەنە نوێیەکە هەموو هێزە براوەکانی سووننە لەخۆدەگرێت و هاوشێوەی چوارچێوەی هەماهەنگییە و چەترێکی کۆکەرەوەیە بە ئامانجی دۆزینەوەی چارەسەر بۆ قەیرانەکان و گفتوگۆکردن لەسەر دۆخی پێکهاتەی سوننە و دانوستان لەگەڵ هاوبەشە کورد و شیعەکان.

بەدر فەحل ئاماژەی بەوەشکرد، لە کۆبوونەوەکەدا بەهیچ شێوەیەک باس لە پرسی پۆستەکان نەکراوە، هێشتا زووە قسە لەسەر پۆستەکان بکرێت.

گۆشەیەکی دیکەی دیمەنەکە: سەبارەت بە دابەشکردن و یەکلاکردنەوەی پۆستەکان بە تایبەتی پۆستی سەرۆکی پەرلەمان کە پشکی سوننەکانە، فەحل وتی: "دەستەیەکی هەماهەنگی پێکدەهێنرێت و بە بەردەوامی کۆبوونەوە دەکرێت، هەموو شتێکی پەیوەست بە پێکهاتەی سوننە لە ئەنجوومەنەکە بڕیاری لەسەر دەدەرێت"، ئاماژەی بەوەشکرد کە "لە سەرەتاوە دەست بە دانوستان دەکەین سەبارەت بە پارێزگاکانی سوننەنشین و ئەمەش گرنگترین شتە بۆ ئێمە لە قۆناغی داهاتوودا".