دەستەی دەستپاکی عێراق لەسەر دیارنەمانی 2.5 تریلیۆن دینارەکە دێتە سەرهێڵ

ئاڤا نیوز

دەستەی دەستپاکیی فیدراڵی ڕایدەگەیێنێت، دەستیکردووە بە لێکۆڵینەوە و بەدواداچوون لە زانیارییەکان سەبارەت بەو بڕە پارەیەی کە لە سندووقی چاودێریی کۆمەڵایەتیدا دانرابوو.

چیرۆکی سەرەکی: لە چەند ڕۆژی ڕابردوودا، ئەحمەد ئەسەدی، وەزیری کار و کاروباری کۆمەڵایەتیی عێراق، لە چاوپێکەوتنێکی تەلەڤیزیۆنیدا ئاماژەی بەوە کردبوو تەواوی پارەی سندووقی چاودێریی کۆمەڵایەتی، کە بڕەکەی 2 تریلیۆن و 500 ملیار دینارە، دیار نەماوە. ئەمەش کاردانەوەیەکی بەرفراوانی لێکەوتەوە و بە "دزیی نوێی سەدە" ناوبرا، دواتر وەزارەتی کار و کاروباری کۆمەڵایەتی و وەزارەتی دارایی و بانکی ڕافیدەین بە ڕاگەیێنراوی جیا هاتنە دەنگ.

ڕاگەیێنراوی فەرمی: دەستەی دەستپاکیی فیدراڵی لە ڕاگەیێنراوێکدا ئاماژە بەوە دەکات تیمەکانیان دەستیان بە لێکۆڵینەوە و بەدواداچوون و وردبینی کردووە لەسەر زانیارییەکانی "کشانەوەی 2.5 تریلیۆن دینار لە سندووقی چاودێریی کۆمەڵایەتی" کە میدیاکان و تۆڕە کۆمەڵایەتییەکان بڵاویان کردبووەوە.

دەستەکە ڕوونیشی کردەوە کە تیمەکانی دەستیان بە ڕێوشوێن و ئەرکەکانی بەدواداچوون و لێکۆڵینەوە و وردبینی کردووە بۆ گەیشتن بە وردەکاریی ئەو زانیارییانە؛ ئەمەش وەک ئامادەکارییەک بۆ گرتنەبەری ڕێوشوێنی یاسایی پێویست.

ئەوەی لەبارەیەوە دەگوترێت: ڕۆژی یەکشەممە وەزارەتی دارایی لەسەر ئەم بابەتە ڕایگەیاندبوو: "بە سەرنجەوە بەدواداچوونمان بۆ ئەو لێدوانە تەلەفزیۆنییەی وەزیری کار و کاروباری کۆمەڵایەتی کرد، کە زانیاری نادروستی سەبارەت بە ڕاکێشانی پارە لە هەژماری تۆڕی چاودێریی کۆمەڵایەتی خستووەتەڕوو، دەمانەوێت ئەوە ڕوون بکەینەوە کە پارەکان ڕانەکێشراون، بەڵکو تەنیا هەژمارەکە سڕ کراوە".