موراد قەرەیلان: پێویستە دان بە ناسنامە و مافەکانی کورد بنرێت

ئاڤا نیوز 

فەرماندەی گشتیی هەپەگە باس لەوەدەکات، چوونی شاندی کۆمیسیۆنییەکەی تورکیا بۆ لای ئۆجەلان بە پێویست دەزانێت و دەڵێت، بڕیارەکە لەجێی خۆیدایە.

چیرۆکی سەرەکی: 21-11-2025 کۆمیسیۆنی یەکڕیزیی نیشتمانی، برایەتی و دیموکراسی بە دەنگی سێ لەسەر پێنجی ئەندامانی بڕیاری دا سەردانی عەبدوڵڵا ئۆجەلان، ڕێبەری زیندانیکراوی پەکەکە بکات لە دوورگەی ئیمرالی، ئەمەش بەردەوام یەکێک بوو لە داواکارییە سەرەکییەکانی دەم پارتی و پەکەکە بۆ سەرخستنی پرۆسەکە.

لێدوانی فەرمی: موراد قەرەیلان، فەرماندەی گشتیی هێزەکانی پاراستنی گەل (هەپەگە) لە میانی چاوپێکەوتنێک لەگەڵ کەناڵی ستێرک تی ڤی ئاماژە بەوە دەدات لەم قۆناغە مێژووییەدا کە نەخشەی ناوچەکە دادەڕێژرێتەوە، بەبێ کەوتنە گفتوگۆی ڕاستەوخۆ لەگەڵ ئۆجەلان پرۆسەی ئاشتی ناگاتە ئەنجام و دەڵێت: کەس ناتوانێت هێز و ئیرادەی گەلی کورد لە خۆرهەڵاتی ناوەڕاست نادیدە بگرێت. پەیوەندییەکانی کورد و تورک لە خاڵێکی هەستیاردایە.

بە تەنیشت ئەم بابەتەوە: قەرەیلان سەرنج دەخاتە سەر ئەوەی تەنیا دەرکردنی یاسا بۆ ئەوەی گەریلاکان چەک دابنێن و بگەڕێنەوە، نابێتە هۆی چارەسەرکردنی پرسی کورد و دەڵێت: ڕاستە کۆمیسیۆنە پەرلەمانییەکە ناتوانێت بە تەنیا بریار بدات، بەڵام دەتوانێت لە ڕێی پێشکەشکردنی پێشنیازەکانیەوە ڕۆڵێکی زۆر گرنگ بگێڕێت بۆ چارەسەرکردنی ڕیشەیی پرسی کورد. 

لەلایەکی دیکەوە: قەرەیلان بە پێویستی دەزانێت بەپێی یاساکان لە تورکیا دان بە بوون و مافەکانی گەلی کورددا بنرێت و دەڵێت: پێویستە یاسای پەیوەندیدار بە یەکگرتنی دیموکراتییانە و هاوپەیمانێتیی نێوان هەردوو گەلی کورد و تورک دەربکرێن. هەروەها سوودمەندبوونی ئۆجەلان لە مافی هیوا ئێجگار گرنگە.

زانیاریی زیاتر: موراد قەرەیلان لەبارەی کشانەوەی گەریلاکان لە ناوچەی زاپ دەڵێت: کشانەوەمان لەو ناوچانە بەو واتایە نایەت، پرۆسەکە زۆر باش بەڕێوە دەچێت. بەڵکو بۆ ڕێگەگرتن لە ئەگەری پێکدادان و بۆ ئەوەی پرۆسەکە گیر نەخوات، ئەو هەنگاوانەمان ناون.