ئاکسیۆس: ترەمپ بەنیازە ڕاستەوخۆ قسە لەگەڵ سەرۆکی ڤەنزوێلا بکات

ئاڤا نیوز

بەپێی هەواڵێکی ئاکسیۆس ترەمپ پلانی خۆی بۆ قسەکردنی ڕاستەوخۆی لەگەڵ نیکۆلاس مادۆرۆ بە ڕاوێژکارەکانی ڕاگەیاندووە و تا ئێستا هیچ وادەیەک بۆ قسەکردنەکە  دیاری نەکراوە، کە ئەم هەنگاوە نوێیە لە کاتێکدایە واشنتن مادۆرۆی وەک تیرۆریستێکی بواری ماددە هۆشبەرەکان ناساندووە.

وێنە گەورەکە: بەپێی ڕاپۆرتێکی پێگەی هەواڵی ئەکسیۆس دۆناڵد ترەمپ، سەرۆکی ویلایەتە یەکگرتووەکانی ئەمەریکا بە راوێژکارەکانی ڕاگەیاندووە کە لە پلانیدایە راستەوخۆ پەیوەندی بە نیکۆلاس مادۆرۆ، سەرۆکی ڤەنزوێلاوە بکات. ئەم هەنگاوەی ترەمپ لە کاتێکدایە کە واشنتن سەرۆکی ڤەنزوێلای وەک سەرۆکی ڕێکخراوێکی تیرۆریستی ناساندووە.

ئەوەی پێویستە بیزانیت: بەپێی زانیاریی بەرپرسانی ئیدارەی ئەمەریکا، بڕیارەکەی ترەمپ خاڵێکی وەرچەرخانە لە سیاسەتی گوشاری سەربازی بۆ سەر ڤەنزوێلا، ئەوەش وەک ئاماژەیەکە کە لەم کاتەدا ئەمەریکا نیازی نییە هێرشی مووشەکی یان هێرشی زەمینی راستەوخۆ بکاتە سەر ئەو وڵاتە.

لە لایەکی دیکەوە: بەرپرسێکی ئاگادار لە کۆشکی سپی بە میدیاکانی ڕاگەیاندووە: لەم قۆناغەدا هیچ کەسێک پلانی ئەوەی نییە بچێتە ناو ڤەنزوێلا بۆ ئەوەی تەقە لە مادۆرۆ بکات یان دەستگیری بکات، ناتوانین بڵێین هەرگیز ئەوە ڕوونادات، بەڵام لە ئێستادا ئەوە پلانەکە نییە.

ئەو بەرپرسە ئاماژەی بەوەش کرد کە ستراتیژیی ئێستای ئەمەریکا بریتییە لە تەقاندنەوەی ئەو بەلەمانەی ماددەی هۆشبەر دەگوازنەوە و وەستاندنی پرۆسەی قاچاخچێتییەکە.

زانیاریی زیاتر: سەرچاوەکان ئاشکرایان کردووە کە تا ئێستا هیچ وادەیەک دیاری نەکراوە و بابەتەکە تەنها لە قۆناغی ئامادەکاریدایە، کە جێگای ئاماژەیە ڕۆژی دووشەممە ئەمەریکا بە فەرمی گرووپی Cartel de los Solesی کە بنکەکەی لە ڤەنزۆێلایە، خستە لیستی ڕێکخراوە تیرۆریستییە بیانییەکانەوە.