پەیامێکی نوێ لە مەسرور بارزانی و ئەمریکاوە لەبارەی پێکهێنانی حکومەتی نوێی عێراق

ئاڤا نیوز

هەڵسوڕێنەری باڵیۆزخانەی ئەمەریکا و سەرۆکوەزیران مەسرور بارزانی، هاوڕابوون لەسەر گرنگیی پێکهینانی حکومەتێکی خزمەتگوزار کە بێ جیاوازی خزمەتی گشت هاووڵاتیان و پێکهاتەکانی عێراق بکات. 

چیرۆکی سەرەکی: ئەمڕۆ سێشەممە 11/25، مەسرور بارزانی، سەرۆکی حکومەتی هەرێمی کوردستان، پێشوازی لە جۆشوا هاریس، هەڵسوڕێنەری باڵیۆزخانەی ئەمەریکا لە عێراق کرد، کە وێندی گرین، کونسوڵی گشتیی ئەمەریکا لە هەرێمی کوردستان ئامادەی بوو، گفتوگۆ لەبارەی پەرەپێدانی پەیوەنديی دوولایەنە و دۆخی گشتیی عێراق و دوای هەڵبژاردنی ئەنجوومەنی نوێنەران و گفتوگۆکانی پێکهێنانی کابینەی نوێی عێراق کرا.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاویکردەوە: لە کۆبوونەوەکە دا هەردوولا هاوڕابوون لە سەر گرنگیی پێکهینانی حکومەتێکی خزمەتگوزار کە بێ جیاوازی خزمەتی گشت هاووڵاتیان و پێکهاتەکانی عێراق بکات و ڕێز لە مافە دەستوورییەکانی هەرێمی کوردستان و سیستەمی فیدراڵی بگرێت.

- لە بەشێکی دیکەی ڕاگەیێنراوەکە دا هاتووە،  هەردوولا هاوڕابوون لە پێویستیی دابینکردنی شایستە داراییەکان و بەشەبودجەی هەرێمی کوردستان لە بودجەی گشتیی عێراق، هاوکات بەردەوامبوونی هەناردەکردنی نەوتی هەرێمی کوردستان لە ڕێگەی بەندەری جەیهانی تورکیا.

لەلایەکی دیکەوە: هەڵسوڕێنەری باڵیۆزخانەی ئەمەریکا دەستخۆشی لە سەرۆکی حکومەت کرد بۆ چاکسازییەکانی حکومەتی هەرێمی کوردستان لە کەرتە جۆراوجۆرەکان، بەتایبەتی لە بواری دارایی و پشتیوانیشی بۆ ئەو چاکسازییانە دەربڕی.