ئاڤای خەڵک؛ گەنجانی سیدەکان کێشەی نەبوونی یاریگەیەکی مۆدێرنی وەرزشییان هەیە

ئاڤا نیوز

 

لە سنووری ناحیەی سیدەکان، سەرەڕای بوونی ژمارەیەکی زۆر لە وەرزشەوان و تیپی میللی، نەبوونی یاریگایەکی مۆدێرن بووەتە گرفتێکی سەرەکی، لە بەرامبەردا ئیدارەی ناوچەکە ڕایدەگەیەنێت کە دیزاینی پڕۆژەی یاریگاکە تەواو بووە.

 

چیرۆکی سەرەکی: لە ئێستادا لە سنووری سیدەکان زیاتر لە 20 تیمی تۆپی پێ و دەیان وەرزشەوان هەن کە ساڵانە چەندین خولی وەرزشی ئەنجام دەدەن، بەڵام بەدەست نەبوونی یاریگای شیاوەوە دەناڵێنن.

 

کرێکار قادر، یەکێک لە وەرزشەوانانی سنوورەکە بە ئاڤای گوت ڕایگەیاند، چالاکییە وەرزشییەکانیان لە یاریگایەکی خۆڵدا ئەنجام دەدەن و وتی: "بەهۆی تەپوتۆز و قوڕ و لیتەوە زۆرجار یاریمان پێ ناکرێت و بەو هۆیەشەوە یاریزانەکانمان تووشی پێکان دەبن."

 

ئەو وەرزشەوانە ئاماژەی بەوەش کرد، ئەگەرچی یاریگایەکی گەورەی 11 یاریزانییان هەیە، بەڵام بەهۆی ئەوەی زەوییەکەی خۆڵە، سوودی لێ نەبینراوە، بۆیە داواکارن بکرێتە چیمەن تاوەکو بتوانن گەشە بە وەرزشەکەیان بدەن و یانەی وەرزشییان هەبێت.

 

لێدوانی فەرمی: لەلایەن خۆیەوە ئیحسان چەلەبی، قایمقامی سیدەکان لە ڕێگەی ئاڤاوە وەڵامی داواکاریی وەرزشەوانانی دایەوە و ڕایگەیاند: "مژدە بە وەرزشەوانان دەدەین کە دیزاینی یاریگاکە تەواو بووە و ڕەزامەندی لەسەر دەرخستەکەشی دراوە."

 

قایمقامی سیدەکان ڕوونیشیکردەوە، لە ئێستادا چاوەڕوانی ئیدارەی سەربەخۆی سۆرانن بۆ تەواوکردنی ڕێکارەکان و لە کاتێکی نزیکدا لەگەڵ دابینکردنی بودجە، دەست بە دروستکردنی یاریگاکە دەکرێت.