گرفتە تەکنیکییەکانی پچڕانی کارەبا چارەسەر کران

ئاڤا نیوز

 
ئەو  گرفتە تەکنیکییانەی لە تۆڕەکانی کارەبای نیشتیمانی هەبوو، کە دەبووە هۆی پچڕانی کارەبا لە چەند شوێنێکی جیاجیای کوردستان، چارەسەر کران و دۆخی پێدانی کارەبا ئاسایی بووەتەوە.

 

لێدوانی فەرمی: کاوان کەریم، بەڕێوەبەری گشتیی کارەبای هەڵەبجە بە ئاڤا میدیای ڕاگەیاند، پێشتر بەهۆی سیستەمی "ئەندەر فریکوێنسی" (Under Frequency)ـەوە، فشارێکی زۆر لەسەر تۆڕی کارەبای هەڵەبجە هەبوو؛ بەجۆرێک بۆ ئەوەی نەبێتە کوژانەوەی گشتیی (شەتداون)، کارەبای شارەکە دەکوژێنرایەوە، ئاماژەی بەوەش کرد، ئێستا ئەو فشارە لەسەر کارەبای هەڵەبجە لابردراوە و  گرفتەکە چارەسەر کراوە.

لەهەمان کاتدا لە دوو ڕۆژی ڕابردوو بۆ ماوەی دوو کاتژمێر پچڕانی کارەبا لە ڕاپەڕین و  چەند گەڕەکێکی سلێمانی هەبووە، بەڵام گرفتەکە بە زوویی چارەسەر کراوە.

 
لەلایەکی دیکەوە: لە ماوەی 48 کاتژمێری ڕابردوو بەهۆی ڕێکخستنەوە و چاککردنەوەی تۆڕی کارەبا، بەشێک لە دانیشتووانی گەڕەکی فەرمانبەرانی شاری هەولێر تووشی پچڕانی کارەبا بوونەتەوە، وەزارەتی کارەبای حکومەتی هەرێمی کوردستان ڕایگەیاند، تیمەکانیان لەگەڵ پڕۆژەی ڕووناکی کار بۆ گەڕاندنەوەی کارەبا دەکەن.    

 

ئەمەش بزانە: ئەندازیار هەردەوان ئیبراهیم، بەڕێوەبەری گشتی کارەبای سۆران بە ئاڤا میدیای ڕاگەیاند، هیچ کێشەیەک لە کارەبای سۆران نییە، بەڵکو وەک هەر شوێنێکی دیکە کوژانەوەی چەند خولەکی هەبووە کە هەر جارە و کارەبا دەخرایە سەر فیدەرێک، ئەمەش تێستێکی وێستگەکانی کارەبایە و گرفتمان نییە.