ئیلهام ئەحمەد دەنگ بە هاندەرانی یانەی زاخۆ دەدات

ئاڤا نیوز

 

تا دێت پاڵپشتی و دەنگدان بە هاندەرانی یانەی زاخۆ بۆ بردنەوەی خەڵاتی "زەبێست" زیاتر دەبێت، لای خۆیەوە ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری باکوور و ڕۆژهەڵاتی سووریا، دەنگدانی بە هاندەرانی یانەی زاخۆ ڕاگەیاند.

 

وێنە گەورەکە: یەکێتی تۆپی پێی جیهان (FIFA)، هاندەرانی یانەی زاخۆی وەک یەکێک لە سێ بەربژێرانی بردنەوەی خەڵاتی "زەبێست" بۆ باشترین هاندەرانی ساڵی 2025 دەستنیشان کردووە، دیار کردنی براوەی ئەم خەڵاتەش لە نێوان ئەم سێ بەربژێرە، بە دەنگدانی ئەلیکترۆنی لە ڕێگەی وێبسایتی فەرمی(FIFA) یەکلایی دەکرێتەوە.

 

لێدوانی فەرمی: ئیلهام ئەحمەد، بەرپرسی پەیوەندییەکانی دەرەوەی بەڕێوەبەرایەتیی خۆسەری باکوور و رۆژهەڵاتی سووریا، لە نووسینێکدا لە تۆڕی کۆمەڵایەتیی ئێکس، ڕایگەیاندووە: جێگەی دڵخۆشییە، تیمێکی وەرزشی کورد ببێتە یەکەم، بۆیە من دەنگ بە هاندەرانی یانەی زاخۆ دەدەم.

 

ئەوەی پێویستە بیزانیت: دەنگدان بۆ هاندەرانی یانەی زاخۆ لە ڕێگەی وێبسایتی فەرمی فیفا دەبێت، دەنگدانیش تا 28ـی ئەم مانگە بەردەوام دەبێت، ئەو بەربژێرەی زۆرترین دەنگ بەدەست دەهێنێت، خەڵاتەکە دەباتەوە.

 

بۆچی گرنگە: ساڵانە یەکێتی تۆپی پێی جیهان باشترینەکانی تۆپی پێ خەڵات دەکات (باشترین یاریزان و ڕاهێنەر و گۆڵکار) لە ئاستی کوران و کچان، باشترین پێکهاتە و جوانترین گۆڵ و باشترین هاندەر، ئەگەر هاندەرانی یانەی زاخۆ خەڵاتیەکە ببەنەوە ئەوا لەگەڵ باشترینەکانی جیها خەڵاتی "زەبێست" دەباتەوە.

 

باکگراوند: بەربژێرکردنی هاندەرانی یانەی زاخۆ بۆ بەدەستهێنانی ئەم خەڵاتە دوای ئەوە دێت کە هاندەرانی یانەی زاخۆ، لە وەرزی ڕابردووی خولی ئەستێرەکانی عێراق، لە پێش دەستپێکردنی یاری یانەکەیان لە بەرامبەر یانەی حدود، 30 هەزار بوکەڵەیان هەڵدایە ناو یاریگا، بوکەڵەکانیش کۆکرانەوە و بەخشرانە منداڵانی نەخۆش، بەتایبەت ئەو منداڵانەی تووشی نەخۆشیی شێرپەنجە بوونە.